ర‌కుల్ జిమ్‌ లో ర‌చ్చ ర‌చ్చ‌

ఏదైనా ఒక షాపో... బొటిక్కో... జిమ్మో ఓపెన్ అయిందంటే అక్క‌డ వాతావ‌ర‌ణం ఎలా ఉంటుంది? ఒక‌రిద్ద‌రు సినిమావాళ్లు వ‌చ్చేస్తుంటారు... చుట్టూ ఉన్న అభిమానులకి అభివాదం చేస్తూ క‌త్తెర‌తో ట‌పుక్కున రిబ్బ‌న్‌ ని క‌ట్ చేసి, కెమెరాల‌కి కాసిన్ని పోజులిచ్చేసి వెళ్లిపోతుంటారు. కానీ ర‌కుల్ ప్రీత్‌ సింగ్ జిమ్ మాత్రం అందుకు పూర్తి భిన్నంగా ఓపెన్ అయ్యింది. ఓపెనింగ్‌ కి వ‌చ్చిన వాళ్లంద‌రినీ జిమ్‌ లోకి దించేసి కాసేపు క‌స‌ర‌త్తులు చేయించింది. అంద‌రూ సెల‌బ్రిటీలే. అయినా స‌రే... వాళ్లంద‌రితోనూ ర‌క‌ర‌కాల క‌స‌ర‌త్తులు చేయించి కాసేపు జిమ్‌ని క‌ళ‌క‌ళ‌లాడించేలా ప్లాన్ చేసింది ర‌కుల్‌.

హైద‌రాబాద్‌ లో ఎఫ్ 45 పేరుతో ర‌కుల్ ఓ అత్యాధునిక‌మైన జిమ్‌ని ఏర్పాటు చేసింది. ఆ జిమ్ ఓపెనింగ్‌ కి ర‌వితేజ‌ - రానా - రెజీనా - రాశిఖ‌న్నా - న‌వ‌దీప్‌ - ల‌క్ష్మీప్ర‌స‌న్న త‌దిత‌ర తార‌ల్ని ఆహ్వానించింది. ఆన‌వాయితీ ప్ర‌కారం వాళ్ల‌తో రిబ్బ‌న్లేమీ క‌ట్ చేయించ‌లేదు ర‌కుల్‌. వ‌చ్చీ రాగానే జిమ్‌ లోకి పంపించేసింది. ట్రైన‌ర్ల‌తో వాళ్లంద‌రికీ సూచ‌న‌లు ఇప్పిస్తూ క‌స‌ర‌త్తులు చేయించేసింది ర‌కుల్‌. లోప‌లికి మీడియాని కూడా పంపించేసింది. ఒకొక్క‌రు ఒక్కో స్టైల్‌ లో జిమ్ము చేస్తుంటే అక్క‌డి వాతావ‌ర‌ణం అదిరిపోయింది. మీడియా తార‌ల క‌స‌ర‌త్తుల్ని కెమెరాల్లో బంధించ‌డానికి పోటీప‌డింది. త‌న జిమ్‌ లో ఎలాంటి స‌దుపాయాలు ఉన్నాయో చెప్ప‌డం కంటే నేరుగా ఇలా స్టార్ల‌తో క‌స‌ర‌త్తులు చేయిస్తే ఆటోమేటిగ్గా లోప‌లి వాతావ‌రణం మీడియాలో క‌నిపిస్తుంది కాబ‌ట్టి ర‌కుల్ అలా ప్లాన్ చేసింద‌న్న‌మాట‌. మొత్త‌మ్మీద ర‌కుల్ జిమ్‌ కి ఫుల్లు ప‌బ్ల‌సిటీ వ‌చ్చేసింది.