తేజుకి రకుల్ ప్రీత్ ప్రాబ్లెమ్ తెస్తోందా

టాలీవుడ్ సూపర్ స్టార్ మహేష్ బాబు దర్శకుడు మురుగదాస్ కాంబినేషన్ లో తెరకెక్కనున్న చిత్రంలో హీరోయిన్ గా పరిణీతి చోప్రా నటిస్తోందంటూ చాలా రోజులుగా ప్రచారం జరుగుతోంది. ఇందుకోసం ఆ భామకు మూడున్నర కోట్ల రూపాయలు ముట్ట చెప్పారనే టాక్ కూడా వినిపించింది. ఇప్పుడు ఏమైందో తెలీదు కానీ.. సడెన్ గా మహేష్ పక్కన హీరోయిన్ గా రకుల్ ప్రీత్ సింగ్ పేరు వచ్చి చేరింది.

రకుల్ ప్రీత్ కి ఇఫ్పటికే అప్పియరెన్స్ టెస్ట్ కూడా చేసేశారట. ఈ బ్యూటీనే ఫిక్స్ చేసే అవకాశాలు పుష్కలంగా ఉన్నాయని అంటున్నారు. పరిణీతి ఏమయ్యిందో తెలీదు కానీ.. ఇక్కడ ట్విస్ట్ ఏంటంటే ఇప్పుడు మహేష్ మూవీ కోసం రకుల్ ప్రీత్ ఇవ్వబోతున్న డేట్స్.. ఇప్పటికే సాయిధరం తేజ్ కోసం ఇచ్చినవే అంటున్నారు. తిక్క తర్వాత గోపీచంద్ మలినేని దర్శకత్వంలో తేజు ఓ మూవీ చేయనున్నాడు. ఠాగూర్ మధు ఈ చిత్రానికి నిర్మాత కాగా.. సెప్టెంబర్ నుంచి ఈ మూవీ షూటింగ్ ప్రారంభం కానుంది.

తేజుతో చేసే సినిమాకి ఇచ్చిన డేట్స్ నే.. ఇప్పుడు మహేష్ కి ఇవ్వాల్సి వస్తుందని తెలుస్తోంది. రకుల్ తెలుగు - తమిళ సినిమాల్లో బిజీగా ఉండడంతో.. ఇప్పట్లో డేట్స్ ఖాళీ లేవని అంటున్నారు. తెలుగులో రామ్ చరణ్ సరసన ధృవతో పాటు.. బోయపాటి తీయనున్న సినిమాకి కూడా సైన్ చేసింది. మరిప్పుడు మహేష్ కోసం తేజు సినిమాని కాదని అనుకుంటుందో.. లేక రెండు సినిమాలకు రకుల్ డేట్స్ అడ్జస్ట్ చేయనుందో చూడాలి.