ఓ మైగాడ్‌! ర‌కుల్ స్పేస్ దెయ్యం!!

క‌థానాయిక‌ల ఫేజ్ మారుతోందా? గ్లామ‌ర్ ఎలివేష‌న్ అన్న కోణం నుంచి దూరంగా జ‌రిగి త‌మ‌ని తాము నిరూపించుకునేందుకు న‌ట‌న‌కు ఆస్కారం ఉన్న‌ హైఎండ్ క్యారెక్ట‌రైజేష‌న్స్ లో ఛాన్సులు వ‌రిస్తున్నాయా? అంటే అవున‌నే తాజా స‌న్నివేశం చెబుతోంది. కొత్తొక వింత‌.. పాతొక రోత‌! అన్న చందంగా ఇటీవ‌లి కాలంలో క‌థానాయిక‌లు సైతం గ్లామ‌ర్ పాత్ర‌ల కంటే పెర్ఫామెన్స్ బేస్డ్ రోల్స్‌ కే మొగ్గు చూపిస్తున్నారు. మొన్న‌టికి మొన్న మ‌హాన‌టి గా న‌టించిన కీర్తి సురేష్ సైతం త‌న‌కు డీగ్లామ‌ర్ రోల్స్ అంటే ఇష్ట‌మ‌ని ప్ర‌కటించింది.

ఇప్పుడు అదే బాట‌లో కొత్త పంథా ఆలోచ‌న‌ల‌తో ఇత‌ర నాయిక‌లు ముందుకెళుతున్నారు. అమ్మ జ‌య‌ల‌లిత పాత్ర‌లో న‌టించేందుకు నిత్యామీన‌న్ సంత‌కం చేసింద‌ని తెలిసింది. ఇప్పుడు ర‌కుల్ అదే బాట‌లో ప్లాన్ చేస్తోంది. మ‌హాన‌టి సావిత్రి గానో - జ‌య‌లలిత‌ గానో న‌టిస్తేనే కీర్తిప్ర‌తిష్ఠ‌లొస్తాయా? స్పేస్ సైంటిస్టుగా న‌టిస్తే కీర్తి ప్ర‌తిష్ఠ‌లు రావా? అని అనుకున్న‌ట్టుంది... ర‌కుల్ ప్రీత్ సైతం త‌న‌వైపు వ‌చ్చిన ఒక్క గ్రేట్ ఛాన్స్‌ ని ఠ‌పీమ‌ని ఒడిసి ప‌ట్టేసింది.

ఇంత‌కీ ర‌కుల్ ఏ త‌ర‌హా పాత్ర‌లో న‌టిస్తోంది అంటే.. రెగ్యుల‌ర్ మ‌సాలా చిత్రంలో కాకుండా స్పేస్ నేప‌థ్యంలో తెర‌కెక్కుతున్న సైన్స్ ఫిక్ష‌న్‌ సినిమాకి సంత‌కం చేసింది. శివ‌కార్తికేయ‌న్ క‌థానాయ‌కుడిగా ర‌వికుమార్‌ ద‌ర్శ‌క‌త్వంలో తెర‌కెక్కుతున్న‌ భారీ చిత్ర‌మిద‌ని తెలుస్తోంది. ఆస్కార్ గ్ర‌హీత ఏ.ఆర్‌.రెహ‌మాన్ ఈ సినిమాకి సంగీతం అందిస్తున్నారు. ఇప్ప‌టికే ఆన్‌ లొకేష‌న్ చిత్రీక‌ర‌ణ సాగుతోంది. ఈ స్పేస్ మూవీని త‌మిళ సినీప‌రిశ్ర‌మ‌లోనే ఎంతో ఛాలెంజింగ్‌ గా తీస్తున్నార‌ట‌. ఇప్పుడు చెప్పండి ర‌కుల్ ల‌క్కీగాళ్ అనే క‌దా దీన‌ర్థం. వీటితో పాటు త‌మిళంలోనే మ‌రో రెండు సినిమాలు, హిందీలో ఓ రెండు భారీ చిత్రాలు చేస్తోంది ఈ అమ్మ‌డు.