ఐస్మార్ట్ శంకర్ రంగంలో దిగుతున్నాడు

ఎనర్జిటిక్ హీరో రామ్ కు గత ఏడాది హలో గురు ప్రేమ కోసమే రూపంలో ఓ మోస్తరు ఫలితమే దక్కినా తన వర్క్ పట్ల హ్యాపీగానే ఉన్నాడు. అంతకు ముందు వచ్చిన ఉన్నది ఒకటే జిందగీతో పోల్చుకుంటే ఇది బెటర్ గా వర్క్ అవుట్ కావడం ఊరట కలిగించింది. ఇకపోతే ఇటీవలే రామ్ దర్శకుడు పూరి జగన్నాధ్ తో ఐస్మార్ట్ శంకర్ కోసం టై అప్ అయిన సంగతి తెలిసిందే. షూటింగ్ మొదలుకాకుండానే వదిలిన ఫస్ట్ లుక్ పోస్టర్స్ ప్రేక్షకుల్లో ఆసక్తిని రేపాయి. మాస్ హీరోలను తనదైన ప్రత్యేకమైన శైలిలో ప్రెజెంట్ చేసే పూరి ఇందులో వాటితో పాటు టెక్నాలజీని కూడా జోడించినట్టు పోస్టర్స్ లో కనిపించింది.

ఇప్పుడు తాజా అప్ డేట్ ప్రకారం ఐస్మార్ట్ శంకర్ లాంచనంగా ఈ నెల 23 మరియు 24 తేదీలలో ఓపెనింగ్ తో పాటు రెగ్యులర్ షూటింగ్ కూడా మొదలుపెట్టుకోనుంది. పూరి జగన్నాధ్ తో పాటు ఛార్మీ కూడా ఇందులో నిర్మాణ భాగస్వామిగా వ్యవహరిస్తోంది. ఇప్పటికే దీని కోసం తన లుక్ ని పూర్తిగా మర్చేసుకున్న రామ్ పాత్ర రెండు షేడ్స్ లో ఉండొచ్చని ఇన్ సైడ్ టాక్. హీరొయిన్ తో పాటు టెక్నికల్ టీం వివరాలు అదే రోజు ప్రకటించే అవకాశాలు ఉన్నాయి.

సంగీత దర్శకుడిగా మణిశర్మ ఫిక్స్ అయ్యారు. పూరి-మణిల కాంబినేషన్ లో వచ్చిన పోకిరి మ్యూజికల్ గా కమర్షియల్ గా ఇప్పటికీ ఎవర్ గ్రీన్ హిట్టే. గత కొంత కాలంగా తన స్థాయి సక్సెస్ లేక ఇబ్బంది పడుతున్న పూరి ఐస్మార్ట్ శంకర్ లో కావలసిన అన్ని అంశాలు పర్ఫెక్ట్ గా వండాడని అందుకే ఒక్క సిట్టింగ్ లోనే రామ్ ఇంప్రెస్ అయిపోయి ఓకే చెప్పినట్టుగా తెలుస్తోంది. మేలో విడుదల ప్లాన్ చేసిన ఐస్మార్ట్ శంకర్ షూటింగ్ కేవలం మూడు నెలల్లోనే పూర్తి చేసే టార్గెట్ తో పూరి రంగంలో దిగుతున్నాడు