అఫీషియల్: రామ్ సినిమాకు అదే టైటిల్

కొన్ని రోజులుగా ప్రచారంలో ఉన్నదే నిజమైంది. ఎనర్జిటిక్ స్టార్ రామ్ కొత్త సినిమాకు ‘హైపర్’ అనే టైటిల్ కన్ఫమ్ అయింది. దీనికో క్యాచీ ట్యాగ్ లైన్ కూడా పెట్టారు. ‘ప్రతి ఇంట్లోనూ ఒకడుంటాడు’ అనేది ట్యాగ్ లైన్. రామ్ మామూలుగానే హైపర్ యాక్టివ్ అన్నట్లుంటాడు. అతడి సినిమాకు ఈ టైటల్ పెట్టారంటే ఇక సినిమాలో ఇంకెంత ఎనర్జిటిగ్గా.. యాక్టివ్ గా ఉంటాడో అంచనా వేయొచ్చు. 14 రీల్స్ సంస్థ నిర్మిస్తున్న ఈ చిత్రానికి సంతోష్ శ్రీనివాస్ దర్శకత్వం వహిస్తున్నాడు. ఇంతకుముందు సంతోష్-రామ్ కాంబినేషన్లో ‘కందిరీగ’ అనే హిట్ సినిమా వచ్చిన సంగతి తెలిసిందే.

‘నేను శైలజ’ లాంటి క్లాస్ సినిమాతో వరుస ఫ్లాపుల నుంచి బయటపడ్డ రామ్.. ‘హైపర్’తో మళ్లీ తన పాత స్టయిల్లోకి మారుతున్నట్లున్నాడు. అతడి లుక్ పూర్తి స్థాయిలో బయటికి రాలేదు కానీ.. పూర్తి స్థాయి మాస్ క్యారెక్టర్ చేస్తున్నట్లు యూనిట్ సభ్యులు చెబుతున్నారు. రామ్ కెరీర్లోనే అత్యధిక బడ్జెట్ తో తెరకెక్కుతున్న ఈ సినిమాలో రాశి ఖన్నా కథానాయికగా నటిస్తోంది. వీళ్లిద్దరి కాంబినేషన్ లో ఇంతకుముందు వచ్చిన ‘శివం’ పెద్ద ఫ్లాప్ అయింది. మరోవైపు సంతోష్ శ్రీనివాస్ ‘రభస’ లాంటి డిజాస్టర్ తర్వాత తనేంటో రుజువు చేసుకోవాల్సిన పరిస్థితిలో ఉన్నాడు. సెప్టెంబరు 30న ‘హైపర్’ ప్రేక్షకుల ముందుకు రాబోతోంది.