పదేళ్ల వయసు నుంచే ఆసక్తి కలిగిందంటున్న చరణ్

మెగా పవర్ స్టార్ రామ్ చరణ్ ఇటీవల ఫిలింఫేర్ సౌతిండియా అవార్డ్స్ లో 'రంగస్థలం' సినిమాకు గానూ ఉత్తమ నటుడిగా అవార్డును అందుకున్న సంగతి తెలిసిందే. 'రంగస్థలం' అటు బాక్స్ ఆఫీస్ విజయం.. ప్రేక్షకుల ఆదరణతో పాటు ఇలా అవార్డులు కూడా సాధించడం చరణ్ అభిమానులను సంతోషంలో ముంచెత్తింది. ఇదే కాకుండా చరణ్ వైల్డ్ లైఫ్ ఫోటోగ్రఫీ టాలెంట్ గురించి కూడా ఈమధ్యే అందరికీ తెలిసింది. ఇది కూడా అందరినీ ఆశ్చర్యపరిచింది.

ఈమధ్య చరణ్ తన ఫోటోగ్రఫీ హాబీ పై మాట్లాడుతూ తనకు పదేళ్ళ వయసునుంచే ఫోటోగ్రఫీపై ఆసక్తి కలిగిందని.. అప్పటి నుంచి ఫోటోలు తీస్తున్నానని తెలిపారు. జంతువుల ఎమోషన్స్ ను తన ఫోటోలలో బంధించే ప్రయత్నం చేస్తానని తెలిపారు. పైన మీరు చూస్తున్న ఫోటోలో చరణ్ తను తీసిన ఒక ఫోటోపై సంతకం చేస్తున్నారు. అయినా చరణ్ ఇన్నేళ్ళు తన టాలెంట్ ను ప్రేక్షకులకు అభిమానులకు తెలియకుండా ఉంచడం గొప్పవిషయమే.

చరణ్ ప్రస్తుతం రాజమౌళి దర్శకత్వంలో తెరకెక్కుతున్న భారీ బడ్జెట్ చిత్రం 'RRR' లో నటిస్తున్నారు. ఈ సినిమాలో చరణ్ అల్లూరి సీతారామరాజు పాత్రలో నటిస్తుండగా.. యంగ్ టైగర్ ఎన్టీఆర్ కొమరం భీమ్ పాత్రలో నటిస్తున్నారు. 'బాహుబలి' ఫ్రాంచైజీ ఘన విజయం తర్వాత రాజమౌళి దర్శకత్వంలో తెరకెక్కుతున్న సినిమా కావడంతో దేశవ్యాప్తంగా ప్రేక్షకులు ఈ సినిమా కోసం ఆసక్తిగా ఎదురు చూస్తున్నారు.