మంచు కొండల్లో సతీమణితో రాంచరణ్ సరదా ఆటలు..!

టాలీవుడ్ మోస్ట్ లవబుల్ కపుల్ రామ్ చరణ్ - ఉపాసన గురించి ప్రత్యేకంగా చెప్పాల్సిన అవసరం లేదు. ప్రేమ వివాహం చేసుకున్న ఈ మెగా జంట.. ఎంతో అన్యోన్యంగా ఉంటూ ఎందరికో ఆదర్శంగా నిలుస్తున్నారు. ఇక చెర్రీ సినిమా షూటింగ్ లతో ఎంత బిజీగా ఉన్నా.. వీలు చిక్కినప్పుడల్లా తన సతీమణితో కలిసి వెకేషన్స్ వెళ్ళడానికి ఇష్టపడుతుంటారు.

కాకపోతే గత మూడేళ్లుగా 'ఆర్.ఆర్.ఆర్' సినిమా షూటింగ్ లోనే గడిపిన చరణ్.. ఉపాసనతో కలిసి హాలిడేకి వెళ్ళలేకపోయారు. ఇప్పుడు #RC15 షూటింగ్ లో బిజీగా ఉన్నప్పటికీ కాస్త బ్రేక్ తీసుకొని విహారయాత్రకు వెళ్లిపోయారు. ప్రస్తుతం ఈ సెలెబ్రిటీ కపుల్ ఫిన్లాండ్ లో క్వాలిటీ టైం గడుపుతున్నారు. చిన్న పిల్లల్లా ఈ లోకాన్ని మరిచి మంచు పర్వతాలలో విహరిస్తున్నారు.

తాజాగా రామ్ చరణ్ - ఉపాసన దంపతులు ఈ టూర్ కి సంబంధించిన ఓ వీడియోని సోషల్ మీడియా మాధ్యమాల్లో షేర్ చేశారు. ఇందులో మెగా కపుల్ ఎయిర్ పోర్ట్ లో లగేజ్ ట్రాలీపై ఆటలాడుతూ కనిపించారు. మంచు కొండల్లో ఇద్దరూ సరదాగా గడుపుతూ.. పెట్ డాగ్స్ తో కలిసి ఫోటోలకు ఫోజులిచ్చారు. క్యాంప్ ఫైర్ లో చలి కాచుకుంటూ అక్కడి ప్రత్యేక విందును ఆరగిస్తూ ఎంజాయ్ చేస్తున్నారు.

ముఖ్యంగా చరణ్ పూర్తిగా చిన్నపిల్లాడిగా మారిపోయి తన భార్యతో కలిసి అల్లరి చేసినట్లు కనిపిస్తోంది. ఉపాసనతో కలిసి మిస్టర్ సి ఎంజాయ్ చేస్తున్న వీడియో ఇప్పుడు సోషల్ మీడియాలో తెగ వైరల్ అవుతుంది. దీనికి 'భూమి మీద ఉన్న అత్యంత ఆనంద ప్రదేశంలో చాలా ఆనందంగా ఉన్నాం' అని ఉపాసన పేర్కొన్నారు.

రెస్ట్ తీసుకొని RRR ప్రమోషన్స్ కు రెడీ అయ్యానని చరణ్ కామెంట్ పెట్టారు. ఈ ట్రిప్ లో రాంచరణ్ - ఉపాసనలతో పాటుగా వీరి స్నేహితులు మరో జంట కూడా భాగయ్యారు. 'బెటర్ మెంటల్ హెల్త్ కోసం కపుల్ వెకేషన్' అంటూ ఉపాసన షేర్ చేసిన ఫోటోలు - వీడియోలు చూసి మెగా అభిమానులు ఖుషీ అవుతున్నారు.

ఇక సినిమాల విషయానికి వస్తే.. రాజమౌళి దర్శకత్వంలో ఎన్టీఆర్ తో కలిసి నటించిన 'ఆర్ ఆర్ ఆర్' సినిమా విడుదలకు సిద్ధంగా ఉంది. ఇందులో అల్లూరి సీతారామరాజు పాత్రలో చరణ్ కనిపించనున్నారు. భారీ అంచనాల మధ్య తెరకెక్కిన ఈ ఫిక్షనల్ పీరియాడికల్ యాక్షన్ డ్రామా మార్చి 25న ప్రేక్షకుల ముందుకు రానుంది. శంకర్ దర్శకత్వంలో చెర్రీ చేస్తున్న Rc15 వచ్చే ఏడాది సంక్రాంతికి రానుంది.