పదేళ్ల తరువాత డబ్బింగ్ ఏంటమ్మా?

టాలీవుడ్ మెగా పవర్ స్టార్ రామ్ చరణ్ హీరోగా 2007 లో చిరుత సినిమా ద్వారా వెండితెరకు పరిచయమైన సంగతి అందరికి తెలిసిందే. పూరి జగన్నాథ్ దర్శకత్వం వహించిన ఈ సినిమాను సీనియర్ ప్రొడ్యూసర్ సి.అశ్వినీదత్ వైజయంతి ప్రొడక్షన్ పై నిర్మించారు. అయితే దాదాపు 10 సంవత్సరాల తర్వాత ఈ సినిమా తమిళ్ లో రిలీజ్ అవ్వబోతోంది తెలుసా!!

ఈ వారం కోలీవుడ్ లో ఏ సినిమాలు రిలీజ్ కావడం లేదు. సినీ వర్గాల సమ్మె కారణంగా చాలా సినిమాలు ఇంకా విడుదలకు నోచుకోలేదు. దీంతో కొన్ని ధియేటర్స్ లో డబ్బింగ్ సినిమాలను రిలీజ్ చెయ్యాలని డిసైడ్ అయ్యారు. ఈ తరుణంలో రామ్ చరణ్ మొదటి సినిమా చిరుతను చిరుతై వెట్టై అనే టైటిల్ తో తమిళ్ లో రిలీజ్ కి రెడీ అయ్యింది. నేహా శర్మ హీరోయిన్ గా ప్రకాష్ రాజ్ విలన్ గా కనిపించిన ఈ సినిమా టాలీవుడ్ బాక్స్ ఆఫీస్ దగ్గర పర్వాలేదు అనిపించుకుంది. దీంతో అదే తరహాలో ఎంతో కొంత లాభం పొందాలని పీకే స్టూడియో బ్యానర్ వారు ఈ రోజు సినిమాను రిలీజ్ చేయడానికి అన్ని సన్నాహకాలు పూర్తి చేసుకున్నారు. మరి అక్కడ చిరుత ఎంతవరకు హిట్ అవుతుందో చూడాలి.

కాని అసలు పదేళ్ళ తరువాత ఈ సినిమాను డబ్ చేయడం ఏంటి అంటూ అందరూ షాకైపోయారు. అప్పట్లో రామ్ చరణ్‌ 'మగధీర'ను 'మావీరన్' అంటూ రిలీజ్ చేస్తే ఫలితం ఆశించినంతగా రాలేదు. అలాంటిది ఇప్పుడు చెప్పాపెట్టకుండా ఈ సినిమా రిలీజ్ చేస్తే రిజల్ట్ ఎలా ఉంటుందో అని మెగా ఫ్యాన్స్ కూడా ఆందోళన చెందుతున్నారు.