'ఆచార్య' అప్డేట్.. కామ్రేడ్ సిద్ధ కౌగిలిలో ఒదిగిపోయిన అందాల నీలంబారి..!

మెగాస్టార్ చిరంజీవి - మెగా పవర్ స్టార్ రామ్ చరణ్ కలిసి నటిస్తున్న లేటెస్ట్ మూవీ ''ఆచార్య''. కొరటాల శివ దర్శకత్వంలో తెరకెక్కుతోన్న ఈ సినిమా ప్రస్తుతం పోస్ట్ ప్రొడక్షన్ పనులు జరుపుకుంటోంది. ఇందులో చిరు కు జోడీగా కాజల్ అగర్వాల్.. చరణ్ సరసన పూజా హెగ్డే హీరోయిన్లుగా నటిస్తున్నారు. ఇప్పటికే ఈ సినిమాకు సంబంధించిన నుంచి విడుదలైన ప్రచార చిత్రాలు - టీజర్ విశేష స్పందన తెచ్చుకున్నాయి. అలానే ఫస్ట్ సింగిల్ 'లాహే లాహే' శ్రోతలను అలరిస్తూ యూట్యూబ్ లో మిలియన్ల వ్యూస్ రాబట్టింది. ఈ నేపథ్యంలో సినిమాలోని మరో పాటను రిలీజ్ చేయడానికి మేకర్స్ సన్నాహాలు చేస్తున్నారు.

'ఆచార్య' చిత్రంలోని 'నీలంబారి' అనే గీతాన్ని దీపావళి కానుకగా నవంబర్ 5వ తేదీన ఉదయం 11:07 గంటలకు విడుదల చేస్తున్నట్లు మేకర్స్ ప్రకటించారు. మెలోడీ బ్రహ్మ మణిశర్మ స్వరపరిచిన ఈ మెలోడీ గీతం మిమ్మల్ని వెనక్కి తీసుకెళ్తుందని పేర్కొన్నారు. ఈ సందర్భంగా రామ్ చరణ్ - పూజా హెగ్డే లకు సంబంధించిన ఓ పోస్టర్ ని వదిలారు. ఈ చిత్రంలో నక్సలైట్ సిద్ధ ప్రేయసి నీలాంబరిగా పూజా హెగ్డే కనిపించనుంది. తాజాగా వచ్చిన పోస్టర్ లో మురారి వాయిస్తున్న అందాల నీలంబారి సిద్ధ కౌగిలిలో ఒదిగిపోయి ఉంది.

కాగా, 'ఆచార్య' చిత్రాన్ని కొణిదెల ప్రొడక్షన్స్ సమర్పణలో మ్యాట్నీ ఎంటర్టైన్మెంట్స్ బ్యానర్ పై నిరంజన్ రెడ్డి నిర్మిస్తున్నారు. కొరటాల శివ గత చిత్రాల తరహానే సామాజిక అంశాలతో కూడిన కమర్షియల్ ఎంటర్టైనర్ గా తీర్చిదిద్దుతున్నారు. తిరు సినిమాటోగ్రఫీ అందిస్తుండగా.. సురేష్ సెల్వరాజన్ ప్రొడక్షన్ డిజైనర్ గా వర్క్ చేస్తున్నారు. నవీన్ నూలి ఎడిటింగ్ బాధ్యతలు నిర్వహిస్తున్నారు. చిరు - చరణ్ కలిసి స్క్రీన్ షేర్ చేసుకుంటున్న ఈ సినిమాపై భారీ అంచనాలు నెలకొన్నాయి. 2022 ఫిబ్రవరి 4వ తేదీన ప్రపంచ వ్యాప్తంగా ఈ సినిమా రిలీజ్ కానుంది.