రంగస్థలం చాలా మార్చేసింది

రామ్ చరణ్ హీరోగా సుకుమార్ దర్శకత్వంలో తెరకెక్కిన చిత్రం రంగస్థలం. ఈ మూవీ కోసం చెర్రీ ఎంతగా కష్టపడ్డాడో ఇప్పటికే విడుదల చేసిన ప్రమోషన్ మెటీరియల్ చెబుతోంది. ఈ చిత్రానికి సంబంధించిన ఏ చిన్న క్రెడిట్ అయినా సుకుమార్ కే దక్కాలంటూ.. దర్శకుడి ప్రతిభను పొగిడేస్తున్నాడు.

'ఇది ఓ సాధారణ గ్రామానికి చెందిన కథ. దాన్ని ఎంతో అందంగా చూపించాలన్నది దర్శకుడి తపన. అందుకే సెట్స్ లో షూటింగ్ చేసేందుకు ముందు.. మేం గోదావరి ప్రాంతంలోని గ్రామాలకు నిజంగానే వెళ్లి షూట్ చేశాం. దీంతో అక్కడి ప్రజల వాస్తవ జీవనాన్ని అతి దగ్గర నుంచి చూసేందుకు మాకు అవకాశం దక్కింది' అంటున్న రామ్ చరణ్.. ఈ సినిమాకు ముందు తాను ఓ గ్రామంలో ఎప్పుడూ ఇంతకాలం ఉండలేదని అంటున్నాడు. కనీసం ఎప్పడూ లుంగీ కట్టుకోని తాను.. ఈ పాత్రను ఎలా చేయగలనని సుకుమార్ భావించాడో.. ఆ నమ్మకాన్ని నిలబెట్టుకునేందుకు కష్టపడ్డానని అన్నాడు. అందుకే స్క్రిప్ట్ తగినట్లుగా అన్ని విధాలా తనను తాను సిద్ధం చేసుకున్నానని అన్నాడు చెర్రీ.

'రంగస్థలం నాకు చాలానే కొత్త విషయాలను నేర్పింది. ఆర్థికంగా వెనుకబడిన వారి జీవితాలలో లోతులను అనుభవించేలా చేసింది. నాకు వారిపై గౌరవం మరింతగా పెరిగింది. చిట్టిబాబు పాత్ర నాకు జీవితంలో ఎన్నో కొత్త విషయాలు తెలిసొచ్చేలా చేసింది' అన్నాడు మెగా పవర్ స్టార్.