బాలీవుడ్ మూవీలో రామ్ చరణ్ స్పెషల్ రోల్..?

'ఆర్.ఆర్.ఆర్' చిత్రంతో బిగ్గెస్ట్ బ్లాక్ బస్టర్ అందుకున్న మెగా పవర్ స్టార్ రామ్ చరణ్ ఇప్పుడు సరికొత్త పాన్ ఇండియా స్టార్ గా అవతరించారు. ప్రస్తుతం శంకర్ షణ్ముగం దర్శకత్వంలో ఓ భారీ బడ్జెట్ సినిమాలో నటిస్తున్నారు. దీని తర్వాత గౌతమ్ తిన్ననూరితో RC16 మూవీ చేయనున్నారు. ఇదే క్రమంలో చెర్రీ చేయబోయే ప్రాజెక్ట్స్ గురించి రకరకాల వార్తలు వినిపిస్తున్న నేపథ్యంలో.. లేటెస్టుగా ఓ బాలీవుడ్ మూవీలో భాగం అవుతున్నారనే ఓ న్యూస్ చక్కర్లు కొడుతోంది.

కండల వీరుడు సల్మాన్ ఖాన్ ప్రస్తుతం 'కభీ ఈద్ కభీ దివాలీ' అనే సినిమా చేస్తున్న సంగతి తెలిసిందే. పూజా హెడ్గే హీరోయిన్ గా నటిస్తున్న ఈ చిత్రంలో విక్టరీ వెంకటేష్‌ కీలక పాత్ర పోషిస్తున్నారు. ప్రస్తుతం ఈ మూవీ షూటింగ్ హైదరాబాద్ లో జరుగుతోంది. ప్రముఖ బాలీవుడ్ మీడియా కథనం ప్రకారం.. ఓ సౌత్ స్టార్ ప్రత్యేక పాత్రలో కనిపిస్తారని నివేదిక సూచిస్తుంది. అది ఎవరో కాదు రామ్ చరణ్ అని పేర్కొనబడింది.

చిరంజీవి - చరణ్ లతో సల్మాన్ ఖాన్ కు మంచి సాన్నిహిత్యం ఉందనే విషయం తెలిసిందే. ఈ ఫ్రెండ్ షిప్ తోనే మెగా 'గాడ్ ఫాదర్' సినిమాలో సల్లూ భాయ్ కీలక పాత్రలో నటిస్తున్నారు. అయితే ఇప్పుడు బాలీవుడ్ హీరో చేసే సినిమాలో ఒక ప్రత్యేక అతిధి పాత్ర కోసం రామ్ చరణ్ ని బోర్డులోకి తీసుకురావాలనే ఆలోచనతో వచ్చారట. దీనికి మెగా హీరో సైడ్ నుంచి పాజిటివ్ రెస్పాన్స్ వచ్చిందని అంటున్నారు.

ఇటీవల హైదరాబాద్‌ లో సల్మాన్ ఓ పాట షూటింగ్‌లో ఉండగా.. రామ్ చరణ్ అతన్ని కలవడానికి వెళ్లాడట. భారీ స్థాయిలో రూపొందిస్తోన్న ఈ సాంగ్ లో భాగం అవ్వాలని చెర్రీని కొరారట. దీనికి మెగా పవర్ స్టార్ వెంటనే అంగీకరించారట. సల్మాన్ - చరణ్ ల కెమిస్ట్రీ ఈ పాటకు హైలైట్‌ గా నిలుస్తుందని.. ఈ పాటలో వెంకటేష్ కూడా భాగమవుతారని నివేదికలు సూచిస్తున్నాయి. ఇదే నిజమైతే 'తుఫాన్' తర్వాత చరణ్ నటించిన హిందీ సినిమా అవుతుంది.

'కభీ ఈద్ కభీ దివాలీ' చిత్రానికి ఫర్హాద్ సామ్జీ దర్శకత్వం వహిస్తున్నారు. సల్మాన్ ఖాన్ నిర్మిస్తున్న ఈ చిత్రానికి కొత్త టైటిల్‌ ను త్వరలోనే ప్రకటిస్తారని టాక్. దీని కోసం 'భాయిజాన్' అనే టైటిల్‌ ప్రచారంలో ఉంది. ఈ సినిమాకు దేవిశ్రీప్రసాద్ - యోయో హానీ సింగ్ మ్యూజిక్ ఇస్తారని సమాచారం. 2022 క్రిస్మస్‌ సందర్భంగా ఈ చిత్రాన్ని విడుదల చేయడానికి మేకర్స్ ప్లాన్ చేసుకుంటున్నారు.

ఇక రామ్ చరణ్ విషయానికొస్తే ఇటీవల తండ్రి చిరంజీవి తో కలిసి 'ఆచార్య' చిత్రంతో ప్లాప్ అందుకున్నారు. దీంతో ఈసారి #RC15 తో భారీ సక్సెస్ అందుకోవాలని కష్టపడుతున్నారు. ఇదొక పొలిటికల్ యాక్షన్ థ్రిల్లర్. వచ్చే ఏడాది సమ్మర్ లో రిలీజ్ అయ్యే అవకాశం ఉంది. మరోవైపు మెగాస్టార్ నటించే 'గాడ్ ఫాదర్' చిత్రానికి చరణ్ సహ నిర్మాతగా వ్యవహరిస్తున్నారు.