ఇన్ స్టా ఎంట్రీ: గట్టిగా వాయించండెహె..!

మెగా పవర్ స్టార్ రామ్ చరణ్ ఫాలోయింగ్ గురించి తెలిసిందే. అసలే మెగా స్టార్ వారసుడు. పైగా తనే స్వయంగా పెద్ద స్టార్. దీంతో అభిమానగణం ఎక్కువే. అయితే ఎందుకో ఈ జెనరేషన్ స్టార్ల తరహాలో చరణ్ సోషల్ మీడియాలో పెద్దగా యాక్టివ్ గా ఉండడు. ఫేస్ బుక్ ఖాతా ఒక్కటే అధికారికంగా మెయింటెయిన్ చేస్తాడు. అది కూడా ఏదైనా ఇంపార్టెంట్ అప్డేట్ ఉంటేనే వాడతాడు. ఇక ట్విట్టర్.. ఇన్స్టాగ్రామ్ లకు దూరం. ట్విట్టర్ లో చరణ్ తరఫున ఆయన సతీమణి ఉపాసన అప్డేట్స్ ఇస్తూ ఉంటారు. కొన్నేళ్ళ క్రితం ట్విట్టర్ లో చరణ్ యాక్టివ్ గా ఉండేవాడు కానీ తర్వాత ఆ ఖాతాను క్లోజ్ చేశాడు.

అయితే తాజాగా చరణ్ ఫ్యాన్స్ కు ఒక స్వీట్ సర్ ప్రైజ్ ఇస్తూ ఇన్స్టా గ్రామ్ లోకి మెగా పవర్ఫుల్ ఎంట్రీ ఇచ్చాడు. చరణ్ ఇన్స్టాగ్రామ్ ఖాతా ఐడి '@alwaysramcharan'. చరణ్ ఫేస్ బుక్ ఖాతా లో ఉన్న ఫోటోనే ఇక్కడ కూడా ప్రొఫైల్ పిక్ గా పెట్టాడు. ఇక ఈ ఇన్స్టా ఎంట్రీ విషయం తెలియగానే చరణ్ ఫ్యాన్స్ వెల్కం మెసేజ్ లతో హోరెత్తించారు. "వెల్కం అన్నా".. "వెల్కమ్ చిరుత".. "ఇన్స్టా ఇక షేక్ అవుతుంది" అంటూ తమ సంతోషం తెలిపారు. ఒక నెటిజన్ మాత్రం పవన్ కళ్యాణ్ గురించి అడుగుతూ "అబ్బాయ్ వచ్చాడు.. బాబాయ్ ఎప్పుడు?" అంటూ కామెంట్ పెట్టాడు.

ఇప్పటికే చాలామంది టాలీవుడ్ స్టార్లు ఇన్స్టాలో యాక్టివ్ గా ఉంటున్నారు. ఇప్పుడు చరణ్ ఎంట్రీ ఇవ్వడం చూస్తుంటే ఫ్యాన్స్ తో కంటిన్యూగా టచ్ లో ఉండేందుకు డిసైడ్ అయినట్టుగా అనిపిస్తోంది. ఇక ఫ్యాన్స్ చరణ్ నుండి రెగ్యులర్ గా మెగా అప్డేట్స్ ను ఆశించవచ్చు.