సిద్ద నుండి మళ్లీ రామరాజుగా చరణ్‌ చేంజ్‌

మెగా పవర్‌ స్టార్‌ రామ్‌ చరణ్‌ రెండు ప్రతిష్టాత్మక చిత్రాల్లో నటిస్తున్న విషయం తెల్సిందే. జక్కన్న దర్శకత్వంలో రూపొందుతున్న ఆర్‌ఆర్‌ఆర్‌ సినిమాలో అల్లూరి సీతారామ రాజు పాత్రలో నటిస్తున్న చరణ్‌ మరో వైపు మెగాస్టార్ చిరంజీవి కొరటాల కాంబోలో రూపొందుతున్న ప్రతిష్టాత్మక మూవీ ఆచార్యలో సిద్దం అనే కీలక పాత్రలో నటిస్తున్నాడు. భారీ అంచనాలున్న ఈ రెండు సినిమాలు కూడా ముగింపు దశకు చేరుకున్నాయి. మొన్నటి వరకు ఆచార్య సినిమా షూటింగ్ లో పాల్గొన్న చరణ్‌ నిన్నటి నుండి ఆర్ఆర్‌ఆర్ సినిమా షూటింగ్‌ లో జాయిన్ అయ్యాడు.

హైదరాబాద్‌ శివారు ప్రాంతంలో ఉన్న అల్యూమీనియం ఫ్యాక్టరీలో ఆర్‌ఆర్‌ఆర్‌ చిత్రం కోసం వేసిన ప్రత్యేక సెట్టింగ్‌ లో షూటింగ్‌ జరుగుతోంది. చరణ్‌ పై కీలక సన్నివేశాల చిత్రీకరణ జరుపుతున్నారు. ఈ షెడ్యూల్‌ లో ఆలియా భట్‌ కూడా ఉంటుందని తెలుస్తోంది. ఎన్టీఆర్‌ మరియు ఆలియాల కాంబోలో ఒక పాటను కూడా జక్కన్న చిత్రీకరించబోతున్నాడు. పెద్ద ఎత్తున అంచనాలున్న ఈ రెండు సినిమాలు కూడా చరణ్‌ రేంజ్ ను మరింతగా పెంచడం ఖాయం అంటూ మెగా అభిమానులు నమ్మకంగా ఉన్నారు. సిద్ద గా చరణ్‌ మే నెలలో ప్రేక్షకుల ముందుకు రాబోతుండగా రామరాజు పాత్రతో ఈ ఏడాది అక్టోబర్‌ లో రాబోతున్నాడు. ఈ రెండు సినిమాల తర్వాత చరణ్‌ తమిళ స్టార్‌ డైరెక్టర్‌ శంకర్‌ దర్శకత్వంలో దిల్‌ రాజు నిర్మించబోతున్న సినిమాలో నటించబోతున్న విషయం తెల్సిందే.