రామ్ చరణ్ సినిమా టైటిల్ ఏంటంటే...

రామ్ చరణ్ కొత్త సినిమా ముహూర్తానికి రంగం సిద్ధమైంది. గత ఏడాది తమిళంలో బ్లాక్ బస్టర్ హిట్టయిన ‘తనీ ఒరువన్’ రీమేక్ కు ఈ గురువారం ఏకాదశి పర్వదినాన శ్రీకారం చుట్టబోతున్నారు. సురేందర్ రెడ్డి దర్శకత్వం వహించబోతున్న ఈ చిత్రాన్ని అల్లు అరవింద్ నిర్మిస్తున్నాడు. ఈ చిత్రానికి ‘రక్షక్’ అనే టైటిల్ అనుకుంటున్నట్లు ఇంతకుముందు వార్తలు వచ్చిన సంగతి తెలిసిందే. ఐతే అది హిందీ టైటిల్ లాగా ఉంటుందని.. తెలుగు ప్రేక్షకులకు కనెక్టవ్వదని భావించి పక్కనబెట్టేశారట. ఇప్పుడు కొత్త టైటిల్ ప్రచారంలోకి వచ్చింది. ‘ధ్రువ’ అనేది ఈ సినిమా టైటిల్ అంటున్నారు. సీనియర్ పీఆర్వో బీఏ రాజు ఈ టైటిల్ గురించి ట్వీట్ చేశారు కాబట్టి దాదాపుగా ఇదే ఖాయం అనుకోవచ్చు.

ధ్రువ.. సౌండింగ్ బాగుంది, సింపుల్ గా కూడా ఉంది కాబట్టి.. ఇదే ఫైనల్ అయ్యే అవకాశాలున్నాయి. ఇంకో రెండు రోజుల్లో అఫీషియల్ అనౌన్స్ మెంట్ వచ్చే వరకు ఎదురు చూడాలిక. అదే రోజు హీరోయిన్ సంగతి కూడా ఖరారవుతుంది. కాజల్ అని.. కీర్తి సురేష్ అని.. గతంలో ప్రచారం జరిగింది. లేటెస్టుగా రకుల్ ప్రీత్ సింగ్ పేరు తెరమీదికి వచ్చింది. నిజంగా ఎవరు సినిమాలో ఉంటారో కూడా ముహూర్తం రోజు తేలిపోతుంది. విలన్ గా అరవింద్ స్వామేనా కాదా అన్నది కూడా ఆ రోజు క్లారిటీ వచ్చేస్తుంది. సొసైటీలో పెద్ద సైంటిస్టుగా కొనసాగుతూ.. తెర వెనుక నేరాలు చేసే ఓ వైట్ కాలర్ క్రిమినల్ గుట్టు విప్పే యంగ్ ఐపీఎస్ అధికారి కథతో ఈ సినిమా తెరకెక్కబోతోంది.