బిగ్ బాస్ హౌస్ ను రంగస్థలం చేస్తారట

బిగ్ బాస్ తెలుగు రెండో సీజన్ పై సస్పెన్స్ కంటిన్యూ అవుతూనే ఉంది. హోస్ట్ గా ఎవరు వ్యవహరిస్తారనే అంశం ఇంకా తేలలేదు. తొలి సీజన్ ను ఎన్టీఆర్ ఓ రేంజ్ లో పండించి షోను గ్రాండ్ సక్సెస్ చేసిన సంగతి తెలిసిందే. అయితే.. రెండో సీజన్ కు వచ్చేసరికి ఇప్పుడు ఎవరు ఆ పాత్రలో ఒదిగిపోనున్నారో తేలడం లేదు.

మొదటగా హీరో నాని పేరు వినిపించింది కానీ.. ఈ విషయంపై న్యాచురల్ స్టార్ నుంచి క్లారిటీ వచ్చేసింది. ఛానల్ వాళ్లే తుది నిర్ణయం తీసుకోవాల్సి ఉందని అనేశాడు. మళ్లీ ఎన్టీఆర్ కనిపించనున్నాడని అంటున్నారు కానీ.. స్టార్ మా వాళ్ల ఆలోచనలు వేరుగా ఉన్నాయట. ఎన్టీఆర్ ను కాకుండా మరో బడా స్టార్ తో ఈ సారి కార్యక్రమం చేయించాలని.. ఎన్టీఆర్ తో పాటు ఆ హీరోను ఆల్టర్నేట్ గా బిగ్ బాస్ లుగా చూపించాలన్నది వీరి యోచనగా తెలుస్తోంది. ఇప్పుడు రంగస్థలంను రక్తి కట్టించిన రామ్ చరణ్.. బిగ్ బాస్ షోను కూడా అదే స్థాయిలో పండించగల సత్తా ఉన్న వ్యక్తిగా ఛానల్ నిర్వాహకులు భావిస్తున్నారట.

అందుకే ఇప్పటికే రామ్ చరణ్ తో సంప్రదింపులు జరుపుతున్నారని అంటున్నారు. ఇప్పటివరకూ చెర్రీ నుంచి ఈ విషయంపై ఎలాంటి క్లారిటీ రాలేదు. చరణ్ తో బిగ్ బాస్ ను నిర్వహింపచేస్తే.. మాస్ జనాలకు కూడా ఈ కార్యక్రమం చేరువ అవుతుందని ఛానల్ వాళ్లు భావిస్తున్నారు. ఒక వేళ మెగా పవర్ స్టార్ అంగీకరిస్తే ఈ కార్యక్రమం చెర్రీతో చేస్తారని.. లేకపోతే నానితో నిర్వహిస్తారని అంటున్నారు.