మెగా వైల్డ్ లైఫ్ మ్యూజియంపై ప్ర‌శంస‌లు

సినిమాలు.. కెరీర్ ఇదొక్క‌టేనా లైఫ్. అంత‌కుమించి ఇంకేదీ లేదా? అంటే అందుకు స‌రైన ఆన్స‌ర్ ఇచ్చారు మెగా ప‌వ‌ర్ స్టార్ రామ్ చ‌ర‌ణ్‌. ఒక స్టార్ హీరోగా చ‌ర‌ణ్ కెరీర్ బెస్ట్ ఫేజ్ ని చేరుకున్నారు. ఇండ‌స్ట్రీ బ్లాక్ బ‌స్ట‌ర్ల‌లో న‌టించారు. నిర్మాత‌గానూ డాడ్ కి `సైరా న‌ర‌సింహారెడ్డి` లాంటి పాన్ ఇండియా చిత్రాన్ని కానుక‌గా ఇచ్చారు.

ఇక ఇటీవ‌లే స‌క‌ల సౌక‌ర్యాలతో స్వ‌ర్గాన్ని త‌ల‌పించే కొత్త ఇంటిని నిర్మించుకున్నారు. మెగాస్టార్ తో క‌లిసి చ‌ర‌ణ్-ఉపాస‌న ఈ ఇంటి కోసం ఎంత‌గానో త‌పించారు. ఈ కొత్త ఇంట్లోనే ఎయిటీస్ స్టార్స్ సెల‌బ్రేష‌న్ ని మెగాస్టార్-చ‌ర‌ణ్‌ హోస్టింగ్ చేసిన సంగ‌తి తెలిసిందే. ఇక ఈ విలాసాల భ‌వంతిలో ఎవ‌రూ ఊహించ‌ని మ‌రో కొత్త విష‌యాన్ని తాజాగా చ‌ర‌ణ్ రివీల్ చేశారు.

త‌న అభిరుచి మేర‌కు ఈ ఇంట్లోనే వైల్డ్ లైఫ్ ఫోటోగ్రఫీకి సంబంధించిన మ్యూజియమ్ ని ఏర్పాటు చేశార‌ట‌. ఈ మ్యూజియంలో చ‌ర‌ణ్ వైల్డ్ లైఫ్ ఫోటోగ్ర‌ఫీకి సంబంధించిన చాలా ఫోటోల‌ను ఛాయాచిత్రాల రూపంలో ఏర్పాటు చేశారు. వీటికి ఇండ‌స్ట్రీ బెస్ట్ సెల‌బ్రిటీల నుంచి కితాబు ద‌క్కింది. కింగ్ నాగార్జున- అమల- అఖిల్- సమంత- మంచు లక్ష్మీ త‌దిత‌ర గెస్ట్ లు ఈ ఫోటోగ్ర‌ఫీని చూసి ఆశ్చ‌ర్య‌పోయార‌ట‌. ఇక ఇదే స్ఫూర్తితో త్వ‌ర‌లో `వైల్డెస్ట్ డ్రీమ్స్` పేరుతో స‌హాయ‌నిధిని సేక‌రించ‌నున్నార‌ట‌. చెర్రీ-ఉపాస‌న జంట వైల్డ్ లైఫ్ ప్రొటెక్ష‌న్ కోసం త‌మ‌వంతు సాయం చేయ‌నున్నారు. ఇక వైల్డ్ లైఫ్ ఫోటోగ్ర‌ఫీపై త‌న‌కు ఉన్న మ‌క్కువ కార‌ణంగానే చ‌ర‌ణ్ ఇంత‌కుముందు ఉపాస‌నా స‌మేతుడై ద‌క్షిణాఫ్రికా అడ‌వుల్లో విహారానికి వెళ్లారు. అక్క‌డ క్రూర‌మృగాల్ని చాలా ద‌గ్గ‌ర‌గా త‌న కెమెరాలో బంధించారు. ఆ ఫోటోల‌న్నిటినీ మ్యూజియంలో వీక్షించిన నాగార్జున‌.. మంచు ల‌క్ష్మి త‌దిత‌ర అతిధులు ప్ర‌శంస‌ల జ‌ల్లు కురిపించార‌ట‌. ఇక చ‌ర‌ణ్ సిస్ట‌ర్స్ సుశ్మిత‌-శ్రీ‌జ‌-నిహారిక సైతం ఈ ఛాయాచిత్రాల‌కు అబ్బుర‌ప‌డిపోయార‌ట‌.