వినయ విధేయ జోడీ మరోసారి రిపీట్?

మెగాస్టార్ చిరంజీవి - స్టార్ డైరెక్టర్ కొరటాల శివ కాంబినేషన్లో #చిరు152 తెరకెక్కుతున్న సంగతి తెలిసిందే. ఈ సినిమాను మ్యాట్నీ ఎంటర్టైన్మెంట్స్ బ్యానర్ తో కలిసి కొణిదెల ప్రొడక్షన్స్ బ్యానర్ పై రామ్ చరణ్ నిర్మిస్తున్నారు. నిర్మాతగానే కాకుండా ఈ సినిమాలో చరణ్ ఒక కీలక పాత్రలో నటిస్తున్నారు. ఈ పాత్ర గురించి ఇప్పటికే ఆసక్తికర అంశాలు ప్రచారంలో ఉన్నాయి.

ఈ సినిమాలో చరణ్ కు జోడీగా బాలీవుడ్ భామ కియారా అద్వాని పేరును దర్శకుడు కొరటాల శివ పరిశీలిస్తున్నారట. కొరటాల శివ 'భరత్ అనే నేను' సినిమాతో కియారాను తెలుగు తెరకు పరిచయం చేసిన సంగతి తెలిసిందే. మరోవైపు చరణ్ కూడా కియారాతో అద్వాని 'వినయ విధేయ రామ' చిత్రంలో నటించారు. ఆ సినిమా బాక్స్ ఆఫీస్ దగ్గర నిరాశ పరిచినప్పటికీ చరణ్ - కియారా మంచి ఫ్రెండ్స్ అయ్యారు. దీంతో #చిరు152 లో చరణ్ కు జోడీగా కియారాను అనుకుంటున్నారట. త్వరలోనే ఈ విషయంపై క్లారిటీ వచ్చే అవకాశం ఉంది.

చరణ్ ప్రస్తుతం రాజమౌళి దర్శకత్వంలో తెరకెక్కుతున్న భారీ బడ్జెట్ చిత్రం 'RRR' సినిమాతో బిజీగా ఉన్నారు. ఈ సినిమా పూర్తయిన తర్వాతే #చిరు152 లో నటిస్తారట. అయితే ఇంకా చరణ్ పాత్రపై అధికారికంగా కన్ఫర్మేషన్ రాలేదు.