అంధగాడు.. హాలీవుడ్ సినిమాలా ఉందట

రామ్ గోపాల్ వర్మ చెప్పే కొన్ని మాటలు నిజంగా అంటున్నాడో.. లేక సెటైర్లు వేస్తున్నాడో అర్థం కాదు. ఆయన పొగిడినా.. తెగిడినా.. అది హై పిచ్ లోనే ఉంటుంది. కొన్నిసార్లు మామూలు సినిమాల్ని కూడా ఆయన ఓ రేంజిలో పొగిడేస్తూ ఉంటారు. అలాంటపుడే అనుమానాలు కలుగుతుంటాయి. ‘అంధగాడు’ సినిమా గురించి కూడా వర్మ అన్న మాటలు ఇలాగే ఉన్నాయి మరి.

శుక్రవారం రిలీజైన ఈ సినిమా గురించి డివైడ్ టాక్ వినిపిస్తోంది. ఇది రొటీన్ కమర్షియల్ ఎంటర్టైనర్ అంటున్నారు. ఐతే వర్మ మాత్రం దీన్ని హాలీవుడ్ సినిమాలతో పోల్చేస్తున్నాడు. ఈ సినిమాలో ఎప్పటికప్పుడు జానర్ మారిపోతూ ఉంటుందని.. ముందు కామెడీతో మొదలై.. ఆ తర్వాత లవ్ స్టోరీలా మారుతుందని.. ఆపై థ్రిల్లర్ లాగా.. చివరికి రివెంజ్ డ్రామాలా ముగుస్తుందని.. ఇలా జానర్లు మారిపోతూ సాగిపోవడం అన్నది హాలీవుడ్ సినిమాల్లో మాత్రమే జరుగుతుందని వర్మ అన్నాడు.

హీరో రాజ్ తరుణ్ పెర్ఫామెన్స్ గురించి కూడా వర్మ తెగ పొగిడేశాడు. మొదట్లో నోట్లో వేలు పెడితే కొరకలేని అమాయకుడిలా కనిపిస్తాడని.. ఆపై లవర్ బాయ్ అవుతాడని.. ఎంటర్టైన్ చేస్తాడని.. చివరికి ఒక మాస్ హీరోలాగా కనిపించి ఆశ్చర్య పరుస్తాడని అన్నాడు. రాజ్ తరుణ్ ను గతంలో ఒకసారి వర్మ అతి పొగడ్తల్లో ముంచెత్తిన విషయం గుర్తుండే ఉంటుంది. అంతే కాక అతడి ట్విట్టర్ అకౌంట్లోకి వెళ్లి టూమచ్ కామెంట్లు పెట్టడమూ తెలిసిందే. ఈ నేపథ్యంలో వర్మ చేసిన తాజా కామెంట్లను లైట్ తీసుకుంటున్నారు జనాలు.



Like Us on Facebook : https://www.facebook.com/Tupakidotcom/