వ‌ర్మ కాదు... అత‌ని అసిస్టెంట్‌

రామ్ గోపాల్ వ‌ర్మ నాగార్జున‌కు శివ సినిమాతో మంచి లైఫ్ ఇచ్చాడు. ఆ త‌రువాత తీసిన గోవిందా గోవిందా కూడా నాగ్ జీవితంలో మ‌ర‌పురాని హిట్ సినిమా. అందులోనూ ఆ సినిమాలో శ్రీదేవి హీరోయిన్‌. ఇప్ప‌డ‌దే డైరెక్ట‌ర్ త‌న కొడుకు అఖిల్‌కు కూడా లైఫ్ ఇస్తాడేమో అని ఆశ‌ప‌డ్డాడేమో నాగ్‌. కానీ వ‌ర్మ మాత్రం ఆ అవ‌కాశాన్ని త‌న అసిస్టెంట్‌కు ఇచ్చాడు. ఓ న్యూ క‌మ‌ర్ తో అఖిల్ సినిమా రాబోతోంది.

అఖిల్‌... వ‌ర్మ‌తో క‌లిసి ఆ మ‌ధ్య‌న చిన్న షార్ట్ ఫిల్మ్‌లో న‌టించాడు. వ‌ర్మ టేకింగ్ అఖిల్ కు బాగా న‌చ్చేసింద‌ట‌. త‌న‌తో ఫుల్ లెంగ్త్ సినిమా తీయ‌మ‌ని ఆ కుర్రాడే వ‌ర్మ‌ను కోరాడ‌ట‌. మొద‌ట్లో వ‌ర్మ అందుకు ఒప్పుకున్న‌ట్టు వార్త‌లు వ‌చ్చాయి. కానీ ఇప్పుడు వ‌ర్మ అఖిల్ సినిమా చేయ‌డ‌ట‌. ఆ అవకాశాన్ని త‌న ద‌గ్గ‌ర ఉన్న ఓ టాలెంటెడ్ అసిస్టెంట్‌ కు అప్ప‌జెప్పాడ‌ట‌. అత‌ను ఇప్ప‌టికే అఖిల్ కోసం ఓ క‌థ రాసి వినిపించాడ‌ట‌. ఆ క‌థ లైన్ కు అఖిల్‌... నాగ్ ఓకే చెప్పార‌ట‌. అన్న‌పూర్ణ స్టూడియోస్ లోని స్క్రిప్ట్ వ‌ర్క‌ర్ల సాయంతో ఆ అసిస్టెంట్ స్ర్కిప్ట్ వ‌ర్క్ పూర్తి చేశాడ‌ట‌. అదంతా చ‌దివిన తండ్రీ కొడుకుల సంతృప్తి ప‌డ్డార‌ని తెలుస్తోంది. అతి త్వ‌ర‌లో సెట్స్ మీద‌కు వెళ్ల బోతోంది ఈ సినిమా. అఖిల్ సినిమాతో మ‌న టాలీవుడ్ మ‌రో వ‌ర్మ శిష్యుడు రాబోతున్నాడ‌న్న మాట‌.

మొద‌ట్లో వ‌ర్మతో అఖిల్ సినిమా అని టాక్ వ‌చ్చింది. ఆ త‌రువాత పూరీ జ‌గ‌న్నాథ్‌ తో అన్నారు. ఇప్పుడు ఓ కొత్త కుర్రాడు ద‌ర్శ‌కుడ‌ని తేలింది. అఖిల్‌కు ఇది మూడో సినిమా. మొద‌టి రెండు సినిమాలు ఆశించిన స్థాయిలో ఆడ‌లేదు. మొద‌టి సినిమా అఖిల్ కోసం చాలా ఖ‌ర్చుపెట్టినా ఫ్లాప‌య్యింది. ఇక రెండో సినిమా హ‌లో కాస్త ఫ‌ర్వాలేద‌న‌పించినా... క‌మ‌ర్షియ‌ల్‌ గా హిట్ కొట్ట‌లేక‌పోయింది. దీంతో అఖిల్‌ కు అర్టెంటుగా ఒక హిట్ కావాల్సిన ప‌రిస్థితి. అందుకే నాగ్ కూడా రంగంలోకి దిగాడు.