పవన్‌ పై భీమవరంలో పోటీ చేస్తానంటున్న వర్మ

రామ్‌ గోపాల్‌ వర్మ ఏం మాట్లాడినా, ఏం చేసినా కూడా సంచలనమే అనే విషయం తెల్సిందే. గత కొన్ని రోజులుగా నారా మరియు నందమూరి ఫ్యామిలీస్‌ను టార్గెట్‌ చేస్తూ వస్తున్నాడు. లక్ష్మీస్‌ ఎన్టీఆర్‌ చిత్రంతో గత రోజులుగా సందడి చేస్తున్న వర్మ మళ్లీ పవన్‌ కళ్యాణ్‌ వైపు పడ్డాడు. పవన్‌ కళ్యాణ్‌ పై గతంలో పలు సార్లు వివాదాస్పద వ్యాఖ్యలు చేసిన వర్మ కొన్ని రోజులుగా పవన్‌ విషయంలో సైలెంట్‌ గా ఉన్నాడు. పవన్‌ రాజకీయాల్లో చురుకుగా ఉన్న ఈ సమయంలో వర్మ మరోసారి ఆసక్తికర వ్యాఖ్యలు చేసి చర్చనీయాంశం అయ్యాడు.

ఏపీలో ఎన్నికల హడావుడి కొనసాగుతుంది. ఇప్పటికే నామినేషన్స్‌ పక్రియ పూర్తి అయ్యింది. పవన్‌ కళ్యాణ్‌ రెండు చోట్ల నుండి అసెంబ్లీ బరిలో ఉన్న విషయం తెల్సిందే. పవన్‌ పోటీ చేస్తున్న ఒక నియోజక వర్గం భీమవరం. ఈ నియోజక వర్గంలో పవన్‌ కళ్యాణ్‌ పై తాను పోటీ చేయబోతున్నట్లుగా రామ్‌ గోపాల్‌ వర్మ ప్రకటించాడు. ఇప్పటికే నామినేషన్స్‌ గడువు పూర్తి అయినా కూడా తనకు ఉన్న స్పెషల్‌ పర్మీషన్‌ తో పవన్‌ పై పోటీ చేయబోతున్నట్లుగా ట్విట్టర్‌ లో పేర్కొన్నాడు.

అర్థరాత్రి సమయంలో వర్మ ఈ ట్వీట్స్‌ చేసిన కారణంగా తాగి చేసి ఉంటాడని అంతా భావిస్తున్నారు. అయితే వర్మ తాగి చేసినా కూడా సీరియస్‌ గానే తీసుకోవాల్సి ఉంటుంది. ఏదోలా భీమవరంలో పవన్‌ ను వర్మ ఇబ్బంది పెట్టే అవకాశం ఉందని కొందరు అభిప్రాయం వ్యక్తం చేస్తున్నారు. పూర్తి వివరాలు త్వరలో వెళ్లడిస్తాను అంటూ వర్మ ఎప్పుడు ఎలాంటి బాంబు పేల్చుతాడో చూడాలి. రేపు లక్ష్మీస్‌ ఎన్టీఆర్‌ విడుదల కాబోతున్న నేపథ్యంలో వర్మ పబ్లిసిటీ కోసం ఇలాంటి ప్రకటనలు చేస్తున్నాడా అనే అనుమానాలు కూడా వ్యక్తం అయ్యాయి.

అంతా ఈ విషయమై చర్చించుకుంటున్న సమయంలో వర్మ అడ్వాన్స్ గా ఏప్రిల్ ఫూల్ చేశాను అంటూ జోక్ వేశాడు. దాంతో ఈ వ్యవహారం అంతా కూడా చల్లారింది. మొత్తానికి కొన్ని గంటలు వర్మ చేసిన ట్వీట్ పెద్ద ఎత్తున చర్చకు అయితే తెర లేపింది.