వర్మ పైత్యానికి పరాకాష్ట!!

రామ్ గోపాల్ వర్మ ఈమధ్య సినిమాలకన్నా తనదైన సెటైర్లతోనే మీడియాలో బాగా హైలైట్ అవుతున్నాడు. కొద్దికాలంగా కాస్తంత సైలెంట్ గానే ఉన్నాడు. లేటెస్ట్ గా యంగ్ హీరో విజయ్ దేవరకొండ నటించిన అర్జున్ రెడ్డి సినిమా మరోసారి రామ్ గోపాల్ వర్మను వార్తల్లోకి వచ్చేలా చేసింది. సాధారణంగా సినిమా వాళ్లతోనే డీల్ చేసే రామ్ గోపాల్ వర్మ ఫోకస్ ఈసారి పొలిటికల్ పీపుల్ పై పడింది.

అర్జున్ రెడ్డి సినిమా ప్రచారంలో భాగంగా హీరో విజయ్ దేవరకొండ హీరోయిన్ షాలినికః గాఢమైన లిప్ టు లిప్ కిస్ ఇస్తున్న పోస్టర్ లు అంతటా అతికించారు. సహజంగానే ఈ పోస్టర్ యూత్ ను బాగా ఎట్రాక్ట్ చేసింది. అయితే వీహెచ్ గా పాపులరైన హైదరాబాద్ లోని సీనియర్ కాంగ్రెస్ లీడర్ వి.హనుమంతరావు మాత్రం ఈ పోస్టర్లపై గుస్సా అయిపోయారు. వాటిని బహిరంగంగా చింపేసి తన నిరసన వ్యక్తం చేశారు. దీనిపై రామ్ గోపాల్ వర్మ రియాక్ట్ అవుతూ ఆ పోస్టర్ మీలాంటి తాతయ్యల కోసం కాదంటూ సెటైర్ వేశాడు. దీనిపై వీహెచ్ కస్సుమన్నారు. దీనికి రిటార్ట్ ఇస్తూ వీహెచ్ బుగ్గలపై తాను ముద్దు పెడుతున్నట్టుగా ఆర్జీవీ ఇన్ స్టాగ్రామ్ లో ఓ గ్రాఫిక్ ఫొటో పెట్టాడు. ‘‘బాహుబలి సినిమా కోసం పనిచేసిన 27 మంది గ్రాఫిక్ ఎక్స్ పర్టులంతా కలిసినా ఆయన బుగ్గలపై ముద్దు పెట్టే ఫొటో మాత్రమే క్రియేట్ చేయగలుగుతారు. జేమ్స్ కెమెరాన్ తీసిన అవతార్ టీం అంతా కలిసి పనిచేసినా ఆయన పెదాలపై ముద్దు పెట్టే ఫొటో క్రియేట్ చెయ్యలేరు’ అంటూ ఆర్జీవీ తన పైత్యం మొత్తం బయటపెట్టాడు.

అర్జున్ రెడ్డి సినిమాలో హీరోయిన్ మీకు ముద్దు పెట్టలేదని జెలసీ ఫీలవుతున్నారంటూ వీహెచ్ కు ఆల్రెడీ పంచ్ డైలాగ్ వేసిన రామ్ గోపాల్ వర్మ ఆ ముద్దులు మీకోసం కాదంటూ ఇంకాస్త వ్యంగ్యం మిక్స్ చేసి ఇలా చెప్పుకొచ్చాడు. చూద్దాం.. దీనికి వీహెచ్ ఎలా రియాక్టరవుతారో?