జూనియర్ తో సినిమాకి అదే కారణమా

సంచలన దర్శకుడు అనే ట్యాగ్ నుంచి.. సెన్సేషనల్ ట్వీట్స్ సృష్టికర్తగా రామ్ గోపాల్ వర్మ మారిపోయి చాలాకాలమే అయింది. సినిమాలతో సంచలనాలు సృష్టించి చాలాకాలం కాగా.. తన ప్రతీ ట్వీట్ తో ఏదో ఒక వివాదం సృష్టించడంలో మాత్రం తెగ సక్సెస్ అవుతున్న ఈ డైరెక్టర్.. ప్రస్తుతం బిగ్ బీతో తీసిన సర్కార్3 చిత్రాన్ని రిలీజ్ చేయబోతున్నాడు.

ఆ వెంటనే జూనియర్ బచ్చన్ తో వర్మ ఓ మూవీ చేయనున్నాడనే టాక్ వినిపిస్తోంది. ఈ మధ్య కాలంలో అభిషేక్ బచ్చన్ కు సరైన సినిమా లేదు. కెరీర్ కూడా ప్రమాదంలో పడిపోయింది. అఫ్ కోర్స్.. వర్మ పరిస్థితి కూడా ఏమంత బెటర్ కాదు కానీ.. ఈయన ట్యాలెంట్ పై ఎవరికీ అనుమానాలు లేకపోవడమే.. వర్మకు కలిసొచ్చే విషయం. ఆ సంగతి పక్కన పెడితే.. అసలు ఏ మాత్రం ఫామ్ లో లోని అభిషేక్ తో సినిమా చేయడం వెనుక.. అమితాబ్ హ్యాండ్ ఉందని అంటున్నారు.

కొడుకు కెరీర్ ని గాడిలో పెట్టాలని ఫిక్స్ అయిన అమితాబ్.. అందుకోసం వర్మకు ఆబ్లిగేషన్ పెట్టాడట. అసలు ఆ కండిషన్ మీదే.. వర్మతో సర్కార్3 చేసేందుకు ఒప్పుకున్నాడనే టాక్ కూడా ఉంది. ఇక అభిషేక్-వర్మల కాంబినేషన్ లో రానున్న చిత్రాన్ని వారాల వ్యవధిలోనే పూర్తి చేసేస్తారట. ఎన్ కౌంటర్ స్పెషలిస్ట్ గా అభిషేక్ నటించే ఈ సబ్జెక్ట్ ను.. ముంబై పరిసరాల్లో నాలుగైదు లొకేషన్లలోనే చిత్రీకరిస్తారని తెలుస్తోంది. అటు బడ్జెట్.. ఇటు టైం.. రెండూ కలిసొచ్చేలా వర్మ ప్లాన్ చేశాడని వినికిడి.

Like Us on Facebook : https://www.facebook.com/Tupakidotcom/