వ‌ర్మ మార్కు న‌యీమ్‌.. ఎలా ఉన్నాడో చూడండి

గ‌త కొన్నేళ్ల‌లో రామ్ గోపాల్ వ‌ర్మ సినిమాలు ఎలా ఉన్న‌ప్ప‌టికీ.. త‌న సినిమాల్లో పాత్ర‌ల‌కు త‌గ్గ‌ట్లు కొంద‌రు న‌టీన‌టుల్ని ఎంచుకుని.. వారిని ట్రాన్స్ ఫార్మ్ చేసిన‌ తీరు మాత్రం అంద‌రినీ విస్మ‌యానికి గురి చేసింది. ‘కిల్లింగ్ వీరప్పన్’ ఫస్ట్ లుక్ చూసి.. వీరప్పన్ చనిపోలేదా, తన పేరిట తీస్తున్న సినిమాలో నటించడానికి వచ్చేశాడా అన్న భ్రమ కలిగింది జనాలకు. మామూలుగా చూస్తే వీరప్పన్ పోలికలే కనిపించని సందీప్ భరద్వాజ్ ను అచ్చం వీరప్పన్ లా తయారు చేయ‌డంలో వర్మకు క్రెడిట్ ఉంది.

ఇక ‘ముంబయి ఎటాక్స్ 26/11 ’ సినిమాకు కసబ్ పాత్రధారిని కూడా అలాగే పట్టుకొచ్చాడు. ఆ మధ్య వంగవీటి రాధా పాత్రకు ఎంచుకున్న నటుడి విషయంలోనూ వర్మ ముద్ర కనిపించింది. ‘గవర్నమెంట్’ సినిమా కోసం వర్మ సెలక్ట్ చేసిన దావూద్ ఇబ్రహీం పాత్రధారిని చూసినా మతిపోవడం ఖాయం. తాజాగా ‘న‌యీమ్’ సినిమాలో లీడ్ రోల్ కోసం ఎక్క‌డి నుంచి ప‌ట్టుకొచ్చాడో కానీ.. అచ్చం న‌యీమ్‌ లాగే ఉన్న న‌టుడిని దొర‌క‌బుచ్చుకున్నాడు.

వ‌ర్మ ఆ మ‌ధ్య అనౌన్స్ చేసిన ‘న‌యీమ్’ సినిమా ఉంటుందా లేదా అన్న సందేహాల‌కు తెర‌దించుతూ.. ఈ సినిమా ఆన్ లొకేష‌న్ పిక్స్ కొన్ని బ‌య‌టికి వ‌చ్చాయి. అందులో న‌యీమ్ పాత్ర‌ధారిని చూస్తే.. నిజంగానే న‌యీమ్ ను చూస్తున్న‌ట్లుగా ఉంది. ఆ న‌టుడి పేరేంటో ఇంకా బ‌య‌టికి రాలేదు. బెన‌ర్జీ ఇందులో న‌యీమ్ పాత్ర‌కు రైట్ హ్యాండ్ లాగా క‌నిపిస్తున్నాడు. ఓ మ‌ర్డ‌ర్ చేసి తాపీగా న‌యీమ్ న‌డిచొస్తున్నట్లుగా ఉంది ఆ ఫొటో. మొత్తానికి ‘న‌యీమ్’ సినిమాతో వ‌ర్మ మ‌రో సంచ‌ల‌నానికి తెర‌తీసేలాగే ఉన్నాడు.


Like Us on Facebook : https://www.facebook.com/Tupakidotcom/