వర్మ సినిమా వ్యూస్ చెబితే..వారు గుండె ఆగి చచ్చిపోతారట!!

వివాదాలకు కేరాఫ్ అడ్రస్ గా.. సంచలనాలతో సహవాసం చేసే దర్శకుడు రాంగోపాల్ వర్మ. గడిచిన కొన్నేళ్లుగా సినిమాలు అదే పనిగా తీసి వదలటం ఈ మధ్యన అలవాటుగా మారింది. తాను తీసే ప్రతి సినిమా గురించి భారీ ఎత్తున చర్చ జరగటం తెలిసిందే. తాజాగా ఆయన ఎన్నికల తర్వాత కథ అంటూ పవర్ స్టార్.. జనసేన అధినేత పవన్ కల్యాణ్ మీద పవర్ స్టార్ పేరుతో సినిమా చేశారు. అందరు అనుకుంటున్నారు కానీ.. తాను తీసింది పవన్ కల్యాణ్ మీద కాదని ఆయన పదే పదే చెబుతున్నారు.

తాను తీసిన మూవీ పూర్తిగా కల్పితమని చెబుతున్న ఆర్జీవీ.. పవర్ స్టార్ లో నటించిన వ్యక్తి పవన్ కల్యాణ్ పోలికలతో ఉన్నాడన్న విషయాన్ని వర్మ అంగీకరించకపోవటం విశేషం. చాలామందికి పోలికలతో ఉన్నట్లు అనిపిస్తున్నా.. తనకుమాత్రం అనిపించటం లేదని ఇంటర్వ్యూలలో చెబుతున్నారు. పాటలతో.. ట్రైలర్ తో హాట్ టాపిక్ గా మారిన ఈ సినిమా ఇవాళ ఆర్జీవీ వరల్డ్ థియేటర్లో రిలీజ్ అయ్యింది. సినిమా చూశాక.. పవన్ ఫ్యాన్స్ బిగ్ కన్ఫ్యూజన్ లో ఉన్నట్లుగా బజ్ వినిపిస్తోంది. ఇదిలా ఉంటే.. ఈ సినిమా గురించి వర్మ స్పందించారు.

సినిమాకు మంచి స్పందన వస్తోందని.. చాలామంది ఫోన్లు.. మెసేజ్ లు చేస్తున్నారన్నారు. ఈ సినిమా పూర్తిగా ఫిక్షనల్ అని.. తాను ఊహించి రాసిందే తప్ప మరేమీ లేదన్నారు. పవన్ కల్యాణ్ క్యారెక్టర్ చేసిన వ్యక్తితో మరో మూడు సినిమాలు చేస్తున్నట్లు చెప్పారు. అవేమీ పవర్ స్టార్ కు సీక్వెల్స్ కావన్నారు.

తమ సినిమాకు భారీ వ్యూస్ వచ్చినట్లుగా చెప్పిన వర్మ. తొలి రోజు వచ్చిన వ్యూస్ లెక్క చెబితే ఇండస్ట్రీలోని కొందరి గుండెలు ఆగిపోతాయన్నారు. ఆసూయతో చచ్చిపోతారన్నారు. నిబంధనల ప్రకారం తాను వ్యూస్ లెక్క చెప్పటం లేదు కానీ.. అదిరిపోయే స్పందన వచ్చినట్లుగా ఆర్జీవీ చెప్పారు. ఇంతకీ ఆ కొందరు ఎవరంటే మాత్రం వర్మ చెప్పకపోవటం గమనార్హం.