ఆరు నూరైనా అంటున్న వ‌ర్మ‌

ఓ పక్క పవన్ కళ్యాణ్ ‘సర్దార్ గబ్బర్ సింగ్’ కు సంబంధించి ఓ స్పెషల్ టీజర్‌ తో తన అభిమానులకు న్యూ ఇయర్ ట్రీట్ ఇవ్వడానికి రెడీ అవుతున్నాడు. మరోవైపు మహేష్ బాబు కూడా ‘బ్రహ్మోత్సవం’ టీజర్‌ తో అదే రోజు సందడి చేస్తానంటున్నాడు. ఇక రామ్ కొత్త సినిమా ‘నేను శైలజ’ కూడా కొత్త ఏడాది తొలి రోజే ప్రేక్షకుల ముందుకు రానుంది. ‘అమ్మాయితో అబ్బాయి’ కూడా ఇదే రోజు ప్రేక్షకుల ముందుకు రానుంది. మొత్తానికి కొత్త సంవత్సరాదిలో తెలుగు ప్రేక్షకుల కోసం చాలా కానుకలే సిద్ధమవుతున్నాయి.

ఐతే ఆడియన్స్‌ కి వీళ్లేనా ట్రీట్ ఇచ్చేది.. నేను కూడా ఇస్తా అంటున్నాడు రామ్ గోపాల్ వర్మ. తన దర్శకత్వంలో తెరకెక్కిన ‘కిల్లింగ్ వీరప్పన్’ను జనవరి 1న విడుదల చేయబోతున్నట్లు కన్ఫమ్ చేశాడు ఆర్జీవీ. ఇప్పటికే ఈ సినిమా మూడు నాలుగు డేట్లు మార్చుకుంది. వీరప్పన్ భార్య ముత్తు లక్ష్మితో వివాదాలు.. ఫైనాన్షియల్ ఇష్యూస్ సినిమా వాయిదా పడేలా చేశాయి. ఐతే ఇదిగో అదిగో అంటూ డేట్లు మార్చుకుంటూ పోయిన వర్మ.. జనవరి 1 విషయంలో మాత్రం ఢోకా లేదని.. వంద శాతం ఆ రోజు సినిమా కన్నడ, తెలుగు భాషల్లో ఒకేసారి విడుదలవుతుందని కన్ఫమ్ చేశాడు. వర్మ ఈ మధ్య చేసిన సినిమాల్లోకెల్లా ప్రామిసింగ్‌గా కనిపిస్తున్న ఈ మూవీ.. ఆర్జీవీ అభిమానుల్ని అలరిస్తుందేమో చూడాలి.