అవార్డు గెలుచుకుంది బాహుబలి కాదట

ఏ విషయంపై అయినా విమర్శలు చేయడం.. రివర్స్ కౌంటర్లు వేయడం, ఎటాక్ చేయడంలో సంచలన దర్శకుడు రామ్ గోపాల్ వర్మకు మించినోళ్లు ఎవరూ ఉండరని అనడంలో సందేహం ఏ మాత్రం ఉండదు. ఇప్పుడు బాహుబలికి ఉత్త జాతీయ చిత్రంగా అవార్డ్ రావడంతో.. సినీ ప్రముఖులంతో తెగ పొగిడేస్తున్నారు. తెలుగు సినిమా ఖ్యాతిని మరో మెట్టు ఎక్కించిందని వేనోళ్ల ప్రసంశిస్తున్నారు.

కానీ ఇదే టాపిక్ పై వర్మ స్పందించిన తీరు చూస్తే ఎవరికైనా ఔరా అనిపిస్తుంది. ఎందుకంటే ఈయన వెర్షన్ ప్రకారం బాహుబలి మూవీ జాతీయ అవార్డును గెలుచు కోలేదని తేల్చేశాడు. అలాగని బాహుబలిని తక్కువ చేశాడని అనుకుంటే పొరపాటే. వర్మ ఉద్దేశ్యమేంటో తెలియాలంటే.. ఆ ట్వీట్ ఏంటో తెలియాలి. 'బాహుబలి జాతీయ అవార్డును గెలుచుకోలేదు. ఆ జాతీయ అవార్డే బాహుబలిని గెలుచుకుంది. అవార్డు కమిటీ మెంబర్స్ అందరికీ నా అభినందనలు' ఇదీ వర్మ ట్వీట్.

రామ్ గోపాల్ వర్మకు సెన్సార్ బోర్డ్ పైనా, అవార్డుల కమిటీల పైనా ఏ రేంజ్ మంట ఉందో మనందరికీ తెలుసు. అందుకే ఇలా బాహుబలిని గెలుచుకున్నందుకు జ్యూరీ మెంబర్లకు కంగ్రాట్స్ చెప్పాడు. అంతే కాదు.. త్వరలో రాున్న బాహుబలి2 కూడా జ్యూరీ మెంబర్లను ఆశీర్వదించాలని కోరుకున్నట్లు చెప్పాడు.. దటీజ్ వర్మ.