నిద్రపోతున్న అగ్నిపర్వతమే పవన్

మెగా హీరోలపై రామ్ గోపాల్ వర్మ ట్వీట్స్ ఎలా ఉంటాయో చూస్తూనే ఉంటాం. ఓవైపు విమర్శిస్తున్నట్లుగానే ఉంటూ.. మరోవైపు ఆకాశానికి ఎత్తేస్తుంటాడు. మెగా స్టార్ రేంజ్ ని.. పవర్ స్టార్ క్రేజ్ ని ఆకాశమంత ఎత్తులో చూపించే వర్మ.. చాలాసార్లు మెగాఫ్యాన్స్ విమర్శలకు కూడా గురవుతుంటాడు. ఇప్పుడు సడెన్ గా రూట్ మార్చేసి.. పవన్ ని నేరుగానే పొగడ్తల్లో ముంచెత్తాడు వర్మ. '

పవన్ కళ్యాణ్ నిద్రపోతున్న అగ్ని పర్వతం లాంటోడు.. అప్పుడప్పుడూ గుడగుడలాడుతూ.. పొగలొదులుతూ ఉంటాడు. టైమ్ వచ్చినప్పుడే పేలతాడు' అంటూ వర్మ పెట్టిన ట్వీట్ సెన్సేషన్ అయిపోయింది. ఈ దర్శకుడి నుంచి పవన్ గురించి ఇలాంటి ట్వీట్ అసలు ఏమాత్రం ఊహించనిదే. అప్పట్లో సార్వత్రిక ఎన్నికలకు ముందు పవన్ లాంటి ఇమేజ్ ఉన్న హీరో.. పాలిటిక్స్ లోకి రాకపోతే తనను తాను తక్కువగా అంచనా వేసుకున్నట్లే అన్న వర్మ.. రీసెంట్ ట్వీట్ లో ఏకంగా అగ్నిపర్వతం అనేశాడు. కాకపోతే ప్రస్తుతం ఆ అగ్నిపర్వతం నిద్రపోతోందని కూడా చెప్పాడులే.

టైం వచ్చినపుడు పేలతాడని అనడంలో వర్మ ఉద్దేశ్యమేంటో చెప్పలేం కానీ.. పవన్ ఇమేజ్ పై వర్మకు ఏ రేంజ్ క్లారిటీ ఉందో అర్ధమవుతుంది. కాకపోతే.. ఇలా సడెన్ గా తన సినిమా వంగవీటి రిలీజ్ కి ముందు రోజు ఈ ట్వీట్ పెట్టడంతో.. పవన్ ఫ్యాన్స్ కు వల విసురుతున్నాడనే కామెంట్స్ కూడా బాగానే వినిపిస్తున్నాయి.