షాక్‌ ఇస్తాడా - షేక్‌ చేస్తాడా.?

రామ్‌ గోపాల్‌ వర్మ ఏం చేసినా సంచలనమే. ఇంకా చెప్పాలంటే సంచలనం కోసమే రామ్‌ గోపాల్‌ వర్మ ఎప్పుడూ ఏదో ఒకటి చేస్తుంటాడు. వర్మ తీసే సినిమాల్లో ఒకటో అరా సంచలనాలు ఉంటాయి. అలాంటిది సినిమా మొత్తం అలాంటి బాపతే అయితే. అదిగో అదే లక్ష్మీస్‌ ఎన్టీఆర్‌. ఎన్టీఆర్‌ జీవితంలో ఏం జరిగింది, ఆయన్ను వెన్నుపోటు పొడిచింది ఎవరు అనే కథను.. లక్ష్మీ పార్వతి కోణంలో వెండితెరపై ఆవిష్కరించబోతున్నారు వర్మ. ఇప్పటికే వెన్నుపోటు అనే సాంగ్‌ ని విడుదల చేశారు. చంద్రబాబునాయుడు - లక్ష్మీ పార్వతి పాత్రల్లో నటిస్తున్న ఆర్టిస్తుల్ని సోషల్‌ మీడియా ద్వారా ప్రపంచానికి పరిచయం చేశాడు.

ఇవాళ ఎన్టీఆర్ వర్ధంతి. వర్మ లాంటి వాడికి అద్భుతమైన అవకాశం. ఈ అవకాశాన్ని ఏమాత్రం మిస్‌ చేసుకోకూడదని అనుకుంటున్న వర్మ.. ఈ సాయంత్రం ఓ సంచలన ప్రకటన చేస్తానంటూ ప్రకటించాడు. సంచలన ప్రకటన అంటే అందరూ ట్రైలర్‌ రిలీజ్ చేస్తారేమోనని భావిస్తున్నారు. అందరి ఊహలకు అందితే అతను వర్మ ఎందుకు అవుతాడు. అందుకే అందరూ షాక్‌ అయ్యేలా ఈ సాయంత్రం ఏదో చేయబోతున్నాడని అనుకుంటున్నారు. అదే టైమ్‌ లో ఎంతో ఊరించి తుస్‌ మనిపించేయడం కూడా వర్మకే చెల్లింది. మరి ఈ సాయంత్రం వర్మ షేక్‌ చేయబోతున్నాడో - షాక్‌ ఇవ్వబోతున్నాడో వెయిట్‌ అండ్‌ సీ.