వర్మ.. అసిస్టెంటుకి అసిస్టెంటవుతాడట

తన శిష్యుడు మంచి పేరు సంపాదిస్తే ఏ గురువుకైనా అంత కంటే ఆనందం మరొకటి ఉండదు. రామ్ గోపాల్ వర్మ ఈ ఆనందాన్ని చాలాసార్లు అనుభవించాడు. ఆయన శిష్యులు పదుల సంఖ్యలో దర్శకులయ్యారు. వారిలో చాలామంది సంచలన విజయాలందుకున్నారు. దర్శకులుగా గొప్ప పేరు సంపాదించారు. దర్శకుడిగా తాను ఎంత పతనం అయినప్పటికీ.. వర్మ ఇప్పటికీ తన స్కూల్ నుంచి డస్ట్రీకి మంచి దర్శకుల్నే అందిస్తున్నాడు. తాజాగా ‘ఆర్ ఎక్స్ 100’తో పరిచయం అయిన అజయ్ భూపతి సైతం వర్మ అసిస్టెంటే. ఈ సినిమా సంచలన ఓపెనింగ్స్‌ తో దూసుకెళ్తోంది. ఈ నేపథ్యంలో వర్మ తన శిష్యుడిపై ప్రశంసల జల్లు కురిపించాడు.

‘ఆర్ ఎక్స్ 100’కు అదిరిపోయే ఓపెనింగ్స్ వస్తున్నాయని చెప్పిన వర్మ.. టీం మొత్తానికి కంగ్రాట్స్ చెప్పాడు. అలాగే తన శిష్యుడి గురించి మాట్లాడుతూ.. తన అసిస్టెంటుగా పని చేసిన అజయ్.. తన తర్వాత సినిమాకు తనను అసిస్టెంటుగా చేర్చుకోవాలని వర్మ చమత్కరించడం విశేషం. అంతే కాక అజయ్ భూపతికి నాలుగు టాప్ బేనర్లు అడ్వాన్సులు ఇచ్చినట్లుగా తెలిసిందని ట్వీట్ చేశాడు. ఐతే వర్మ ఇలాంటి అతిశయోక్తి మాటలు మాట్లాడటం కొత్తేమీ కాదు. ఆయన పొగిడినా.. తెగిడినా.. దానికి హద్దులేమీ పెట్టుకోడు. వర్మ మాటల్ని పక్కన పెడితే దర్శకుడిగా తన తొలి సినిమాతో అజయ్ బలమైన ముద్రే వేశాడు. ‘ఆర్ ఎక్స్ 100’కి టాక్ డివైడ్ గా ఉన్నా కలెక్షన్లు మాత్రం అదిరిపోతున్నాయి.