సైరా వావ్ అన్న ఆర్జీవి.. నెటిజన్లు షాక్!

స్టార్ హీరోలు ఇమేజ్ చట్రంలో ఇరుక్కుపోతారనేది అందరూ చెప్పే మాట. ఒక జోనర్ లోనే.. లేక కమర్షియల్ ఫార్మాట్ లో సినిమాకు అలవాటు పడిన తర్వాత బైటకురారు. జనాలు కూడా ఆ హీరోలు పెద్ద ప్రయోగం చేస్తే వెంటనే ఒప్పుకోరు. హీరోలనే కాదు డైరెక్టర్లకు కూడా ఒక ఇమేజ్ ఉంటుంది. దర్శకుడు రామ్ గోపాల్ వర్మకు ఒక ఇమేజ్ ఉంది. అదో రకమైన నెగెటివ్ ఇమేజ్.

ఆయన ఏదైనా ట్వీట్ చేస్తే అందులో సెటైర్ ఉంటుంది.. విమర్శ ఉంటుంది.. పదాల తికమక ఉంటుంది. అన్నిటికీ మించి ఫాలోయర్లకు కామెడీ. ఎవరిపైన ట్వీట్ వేస్తాడో వారి అభిమానులకు మాత్రం చేదుమాత్ర మింగినట్టు ఉంటుంది. వర్మ తాజాగా 'సైరా' సెకండ్ ట్రైలర్ పైన స్పందించారు.అయితే ఈ ట్వీట్ లో వర్మ శైలి మిస్ అయింది. దీంతో సోషల్ మీడియాలో కలకలం రేగింది. సైరా సెకండ్ ట్రైలర్ ను షేర్ చేస్తూ వర్మ "వావ్. మెగాస్టార్ చిరంజీవి గారికి సరిగ్గా సరిపోయే సినిమా 'సైరా'. నిర్మాత రామ్ చరణ్ అటు నాన్నగారు చిరంజీవికి.. ఇటు ప్రేక్షకులకు ఇచ్చిన బహుమతి" అంటూ ఒక సగటు చిరు అభిమాని తరహాలో ఎంతో హుందాగా స్పందించాడు.

సరిగ్గా ఇక్కడే వచ్చింది చిక్కు. ఎప్పుడూ పాజిటివ్ గా ట్వీటే సెలెబ్రిటి అయితే నెటిజన్లు పెద్దగా పట్టించుకునేవారు కాదు. వీలైనంతగా విమర్శలు చేసే వర్మ ఇలా పాజిటివ్ గా స్పందించడంతో నెటిజన్ల ఫ్యూజులు ఎగిరిపోయాయి. వింత వింత కామెంట్లతో సందడి చేశారు.

*ఇది మార్నింగ్ ట్వీట్ .. ఆఫ్టర్ 9 పీఎమ్ కొత్త వెర్షన్ వస్తుంది.

*సీనియర్ బచ్చన్ ఉన్నారని సపోర్ట్ చేస్తున్నారా సర్?

*కాసేపు అయ్యాక.. నా ఖాతా హ్యాక్ చేశాడని అంటాడేమో గురుడు!

*చుక్క పడక ముందు ఇలా.. పడితే మారుతుందేమో!

*ఫస్ట్ టైం ట్వీట్ అర్థం అయింది..కానీ అర్థం కాలేదేమోనని అనుమానంగా ఉంది