ఈ డాన్ ఎవరో గుర్తుపట్టగలరా?

ఈ ఫొటోలో ఉన్న డాన్ ఎవరో గుర్తు పట్టగలరా? అని అడిగితే.. క్షణం ఆలస్యం చేయకుండా ‘దావూద్ ఇబ్రహీం’ అని బదులిచ్చేస్తారు జనాలు. పక్కా, కాన్ఫిడెంట్ అని.. అమితాబ్ బచ్చన్ స్టయిల్లో రెట్టించే అడిగితే తప్ప డౌట్లేమీ రావు. వాస్తవానికి ఈ ఫొటోలో ఉన్నది దావూద్ ఇబ్రహీం కాదు. మన డైరెక్టర్ డాన్ రామ్ గోపాల్ వర్మ.

నిన్న అర్ధరాత్రి ‘బ్రూస్ లీ’ గురించి బ్యాటింగ్ చేసి అలసిపోయి పడుకున్న వర్మ.. ఉదయం లేవగానే ఈ ఫొటో పెట్టి.. ‘‘ఈ వ్యక్తి బాగా తెలిసినట్లుగా ఉన్నాడు. కానీ ఎక్కడ చూశానో గుర్తు రావడం లేదు’’ అంటూ తనదైన శైలిలో ఓ కామెంట్ పడేసి కూర్చున్నాడు. ఇంకేముంది రచ్చ మొదలైపోయింది. వర్మ శిష్యుడు పూరి జగన్నాథ్ లైన్ లోకి వచ్చేశాడు. ‘‘నాకీ వ్యక్తి తెలుసు. మోస్ట్ వాంటెడ్’’ అని బదులిచ్చాడు.

‘‘అవునా.. ఎవరు సార్ అతను’’ అని వర్మ అడగడం.. ‘‘ఎఫ్ ఫ్యాక్టరీ ఫౌండర్ అతనే’’ అని పూరి బదులివ్వడం.. ఇలా సాగింది వరస. మధ్యలో హరీష్ శంకర్ కూడా వేలెట్టాడు. ‘‘అతను సైబర్ డాన్. సోషల్ మీడియాలో చాలా డేంజరస్’’ అంటూ ఫన్నీ ట్వీట్ పెట్టాడు. మొత్తానికి పొద్దున లేవగానే తన ట్విట్టర్ అభిమానులకు మంచి మేత పెట్టాడు వర్మ.