రామ్ మిరియాల లేటెస్ట్ స్పెషల్ సాంగ్: 'అర్రెరెరె జాతిరత్నాలు'

నవీన్ పోలిశెట్టి - ఫరీదా అబ్దుల్లా హీరోహీరోయిన్లుగా నటించిన చిత్రం ''జాతిరత్నాలు''. ఈ కామెడీ ఎంటర్టైనర్ లో రాహుల్ రామకృష్ణ - ప్రియదర్శి ఇతర ముఖ్య పాత్రలు పోషించారు. అనుదీప్‌ కేవీ దర్శకత్వం వహించిన ఈ చిత్రాన్ని స్వప్న సినిమాస్‌ పతాకంపై 'మహానటి' నాగ్‌ అశ్విన్‌ నిర్మించారు. మహాశివరాత్రి సందర్భంగా మార్చి 11న ప్రేక్షకుల ముందుకు వచ్చిన ఈ సినిమా మంచి వసూళ్ళు సాధించి బ్లాక్ బస్టర్ హిట్ గా దూసుకెళ్తోంది. ఈ నేపథ్యంలో తాజాగా 'అర్రెరెరె జాతిరత్నాలు' అనే స్పెషల్ సాంగ్ ని చిత్ర యూనిట్ విడుదల చేసింది.

'అర్రెరెరె జాతిరత్నాలూ.. ఎన్నడూ చూడని నవ్వుల వర్షాలు.. చుక్కలు చూపినారు జానేజిగర్ దోస్తులు.. క్లాష్ మాస్ అంతా మామా కేకలు' అంటూ సాగిన ఈ ప్రత్యేక గీతానికి రామ్‌ మిరియాల ట్యూన్ అందించడమే కాకుండా పాడి వినిపించారు. మామా సింగ్ - డైరెక్టర్ అనుదీప్ కేవీ కలిసి లిరిక్స్ రాశారు. 'జాతిరత్నాలు' చిత్రానికి సంబంధించిన ప్రచార కార్యక్రమాలను చూపిస్తున్న ఈ వీడియో విశేషంగా ఆకట్టుకుంటోంది. ఈ చిత్రానికి రథన్ సంగీతం సమకూర్చగా.. మనోహర్ సినిమాటోగ్రాఫర్ గా వ్యవహరించారు. అభినవ్ ఎడిటింగ్ వర్క్ చేశారు. ఈ చిత్రంలో బ్రహ్మానందం - సీనియర్ నరేష్ - మురళీ శర్మ - వెన్నెల కిశోర్‌ - బ్రహ్మజీ - తనికెళ్ల భరణి తదితరులు నటించారు.