అవన్నీ రూమర్లు.. వదిలేయండి -రామ్‌

సక్సెస్‌ కోసం ఆవురావురుమంటూ ఉన్న రామ్‌కి 'పండగ చేస్కో' రూపంలో ఓ హిట్టు దక్కింది. గోపిచంద్‌ మలినేని ఫార్ములా ఫలించి పెద్ద హిట్టు కొట్టాడు. అయితే ఈ సినిమా ఆన్‌సెట్స్‌ ఉండగానే వెంట వెంటనే హిట్లు కొట్టి గతానికి సమాధానం చెప్పాలనుకున్నాడో ఏమో.. తనకి నచ్చిన కథల్ని, దర్శకుల్ని లాక్‌ చేశాడు. ఒంగోలు గిత్త, ఎందుకంటే ప్రేమంట సినిమాలు చెప్పిన గుణపాఠాల్ని నెమరు వేసుకుంటూ తరుణోపాయం ఆలోచించాడు. అప్పట్నుంచి నచ్చిన స్క్రిప్టులతో లైబ్రరీనే క్రియేట్‌ చేశాడు. పనిలో పనిగా పొరుగు భాషల్లో సక్సెస్‌ సాధించిన సినిమాల రీమేక్‌ హక్కులపైనా దృష్టి సారించాడు.

ఆ క్రమంలోనే కన్నడలో హిట్టయిన 'ప్రేమమ్‌' అనే హిట్‌ సినిమా రీమేక్‌ హక్కుల్ని చేజిక్కించుకున్నాడు. త్వరలోనే ఈ చిత్రాన్ని రీమేక్‌ చేస్తున్నాడన్న ప్రచారం సాగింది. దీన్ని ఖండిస్తూ.. కొనడం సంగతి పక్కనబెడితే.. ఇప్పటివరకూ ఆ సినిమా గురించి వినడం తప్ప చూడడం జరగలేదు.. అని చెప్పాడు. ప్రస్తుతం రామ్‌ ఒకేసారి ఇద్దరు దర్శకులతో పనిచేస్తున్నాడు. డెబ్యూ శ్రీనివాసరెడ్డి దర్శకత్వంలో శివం చిత్రంలో నటిస్తున్నాడు. సేమ్‌ టైమ్‌ 'సెకండ్‌ హ్యాండ్‌' ఫేం కిశోర్‌ తిరుమల దర్శకత్వంలో 'హరికథ' అనే చిత్రంలో నటించడానికి సన్నద్ధమవుతున్నాడు. ఈ రెండు సినిమాలు ఈ ఏడాదిలోనే రిలీజ్‌ కానున్నాయి.