ఈద్ స్పెషల్ గా సరికొత్త అప్డేట్ తో వచ్చిన రామారావు..!

మాస్ మహారాజా రవితేజ హీరోగా నూతన దర్శకుడు శరత్ మండవ దర్శకత్వంలో తెరకెక్కుతోన్న యాక్షన్ థ్రిల్లర్ ''రామారావు ఆన్ డ్యూటీ''. ఇప్పటికే షూటింగ్ పూర్తి చేసుకున్న ఈ సినిమాకు సంబంధించిన పోస్ట్ ప్రొడక్షన్ కార్యక్రమాలు శరవేగంగా జరుగుతున్నాయి.

మరోవైపు మేకర్స్ దూకుడుగా సినిమా ప్రమోషన్స్ చేస్తున్నారు. ఇప్పటికే విడుదలైన 'రామారావు..' స్పెషల్ పోస్టర్స్ - టీజర్ ప్రేక్షకులను ఆకట్టుకున్నాయి. అలానే మ్యూజికల్ ప్రమోషన్స్ లో భాగంగా రిలీజ్ చేసిన ఫస్ట్ సింగిల్ 'బుల్ బుల్ తరంగ్' కు అద్భుతమైన స్పందన లభించింది.

ఈ క్రమంలో నేడు ఈద్ ను పురస్కరించుకుని అందరికీ శుభాకాంక్షలు తెలుపుతూ 'రామారావు ఆన్ డ్యూటీ' నుంచి స్పెషల్ పోస్టర్ ను వదలడమే కాదు.. ఓ సరికొత్త అప్డేట్ తో వచ్చారు. సినిమాలోని 'సొట్ట బుగ్గల్లో' అనే రెండో పాటను మే 7న విడుదల చేయనున్నట్లు ప్రకటించారు. ఇదొక డ్యాన్స్ నంబర్ అని తెలుస్తోంది.

ఈ సందర్భంగా రంజాన్ పండక్కి తగ్గట్టుగా రిలీజ్ చేయబడిన పోస్టర్ ఆకట్టుకుంటోంది. రవితేజ ఒక మసీదు ముందు నుండి తన అంబాసిడర్ కారు వైపు నడుచుకుంటూ వస్తున్నాడు. ఇందులో మాస్ రాజా కూల్ అండ్ స్టైలిష్ గా కనిపిస్తున్నారు.

వాస్తవ సంఘటనల ఆధారంగా తెరకెక్కుతున్న 'రామారావు ఆన్ డ్యూటీ' చిత్రంలో రవితేజ డిప్యూటీ కలెక్టర్ గా కనిపించనున్నారు. దివ్యషా కౌశిక్ మరియు రజిషా విజయన్ హీరోయిన్లుగా నటిస్తున్నారు. వేణు తొట్టెంపూడి కీలక పాత్ర పోషిస్తున్నారు.

నాజర్ - సీనియర్ నరేష్ - పవిత్ర లోకేష్ - 'సర్పట్ట' జాన్ విజయ్ - చైతన్య కృష్ణ - తనికెళ్ల భరణి - రాహుల్ రామ కృష్ణ - ఈరోజుల్లో శ్రీ - మధు సూదన్ రావు - సురేఖ వాణి తదితరులు ఇతర పాత్రల్లో కనిపించనున్నారు.

SLV సినిమాస్ LLP మరియు RT టీమ్‌ వర్క్స్‌ బ్యానర్స్ పై సుధాకర్ చెరుకూరి ఈ చిత్రాన్ని నిర్మిస్తున్నారు. శ్యామ్ సీఎస్ సంగీతం సమకూరుస్తున్నారు. సత్యన్‌ సూర్యన్‌ సినిమాటోగ్రఫీ అందించగా.. సాహి సురేష్ ఆర్ట్ డైరెక్టర్ గా వ్యవహరిస్తున్నారు. ప్రవీణ్ కెఎల్ ఎడిటింగ్ వర్క్ చేస్తున్నారు.

'రామారావు ఆన్ డ్యూటీ' చిత్రాన్ని జూన్ 17న ప్రపంచవ్యాప్తంగా థియేటర్లలో గ్రాండ్ రిలీజ్ చేయనున్నారు. 'ఖిలాడి' సినిమాతో పరాజయం చవిచూసిన రవితేజ.. ఈసారి బ్లాక్ బస్టర్ హిట్ అందుకోవాలని అభిమానులు కోరుకుంటున్నారు.