ఎన్టీఆర్ హెచ్చరించినట్లే జక్కన్న మళ్ళీ లేట్ చేశాడు...!

దర్శకధీరుడు రాజమౌళి తెరకెక్కిస్తున్న భారీ మల్టీస్టారర్ 'ఆర్.ఆర్.ఆర్'. యంగ్ టైగర్ ఎన్టీఆర్ - మెగా పవర్ స్టార్ రామ్ చరణ్ కలిసి నటిస్తున్న ఈ చిత్రంపై అంచనాలు ఏ స్థాయిలో ఉన్నాయో ప్రత్యేకంగా చెప్పక్కర్లేదు. ఇప్పటికే విడుదలైన చరణ్ స్పెషల్ వీడియో 'భీమ్ ఫర్ రామరాజు' విశేషంగా ఆకట్టుకుంది. ఈ క్రమంలో నేడు (అక్టోబర్ 22) ఉదయం 11 గంటలకు ఎన్టీఆర్ స్పెషల్ టీజర్ 'రామరాజు ఫర్ భీమ్' విడుదల చేస్తామంటూ ప్రకటించారు. అయితే సినీ అభిమానులు మాత్రం చెప్పిన సమయానికి ఈ టీజర్ రాదని ముంచే ఫిక్స్ అయ్యారు. ఎందుకంటే మిస్టర్ పెర్ఫెక్షనిస్ట్ గా పిలవబడే జక్కన్న సినిమాలకి సంబంధించి ఇంతవరకు ఏ అప్డేట్ కూడా చెప్పిన సమయానికి రిలీజ్ కాలేదు. అది విడుదల తేదీ అయ్యుండొచ్చు.. ఫస్ట్ లుక్ లేదా టీజర్ ట్రైలర్.. ఏది కూడా టైమ్ కి బయటకు రాలేదు. ఈ క్రమంలో అందరూ అనుకున్నట్లే ఇప్పుడు 'రామరాజు ఫర్ భీమ్' కూడా మరో 30 నిమిషాలు లేట్ గా రాబోతోందంటూ ప్రకటించారు.

నిజానికి ఎన్టీఆర్ ముందుగానే 'రామరాజు ఫర్ భీమ్' సమయానికి వస్తుందో రాదో అనే అనుమానం వ్యక్తం చేశాడు. తారక్ ట్వీట్ చేస్తూ 'చరణ్ బ్రో.. మీరు ఇప్పటికే 5 నెలలు ఆలస్యం చేసారని మీరు గ్రహిస్తారని ఆశిస్తున్నాను.. నువ్వు జక్కన్నతో డీల్ చేస్తున్నావ్ జాగ్రత్త.. ఏమైనా జరగవచ్చు!!' అని ఫన్నీ పోస్ట్ పెట్టాడు. 'నన్ను నమ్ము.. ఇది ఆలస్యం అయినందుకు విలువైనదిగా ఉండబోతోంది.. రేపు ఉందయం 11 గంటలకు' అని చరణ్ ట్వీట్ చేశాడు. అయితే ఇప్పుడు ఎన్టీఆర్ హెచ్చరించినట్లే 'రామరాజు ఫర్ భీమ్' చెప్పిన సమయం కంటే 30 నిముషాలు ఆలస్యంగా రానుంది. ఎన్టీఆర్ ట్వీట్ ని రీట్వీట్ చేసిన రాజమౌళి '30 నిమిషాలు ప్లీజ్' అని ట్వీట్ చేశాడు. దీనికి ఫ్యాన్స్ పెద్ద ఎత్తున కామెంట్స్ పెడుతున్నారు.