సూపర్ హిట్ రాక్షసుడు త్వరలో 'సీక్వెల్'తో రానున్నాడా..?

గతేడాది టాలీవుడ్ యంగ్ హీరో బెల్లంకొండ శ్రీనివాస్, బ్యూటీఫుల్ అనుపమ పరమేశ్వరన్ ప్రధాన పాత్రధారులుగా తెరకెక్కిన సస్పెన్సు థ్రిల్లర్ మూవీ 'రాక్షసుడు'. ఈ సినిమాను తమిళ రాచ్చసన్ నుండి తెలుగులోకి రీమేక్ చేశారు నిర్మాత కోనేరు సత్యనారాయణ. ఎంతో కాలం నుండి మంచి సాలిడ్ హిట్ కోసం ఎదురుచూస్తున్న బెల్లంకొండ శ్రీనివాస్ కెరీర్ లోనే బెస్ట్ మూవీగా నిలిచింది రాక్షసుడు. అంతేగాక ఈ సినిమా హీరో శ్రీనివాస్ తో పాటు డైరెక్టర్ రమేష్ వర్మకి కూడా మంచి గుర్తింపు తీసుకొచ్చింది. ఈ మధ్య సినిమాలు ఏ భాషలో హిట్ అయినా ఇతర భాషల్లోకి రీమేక్ చేస్తున్నారు దర్శక నిర్మాతలు. అలాగే తన నిర్మాణంలో హిట్ అయిన రాక్షసుడు సినిమాను బాలీవుడ్ లో రీమేక్ చేయడానికి సన్నాహాలు చేస్తున్నట్లు నిర్మాత కోనేరు సత్యనారాయణ ఇదివరకే వార్తలలో నిలిచారు.

ఇక ఈ రాక్షసుడు సినిమా మంచి హిట్ అవ్వడమే కాకుండా మంచి వసూళ్లను కూడా సాధించింది. అదే ఉత్సాహంతో రాక్షసుడు మూవీకి సీక్వెల్ రూపొందించడానికి ప్లాన్ చేస్తున్నారట చిత్రబృందం. ఈ సినిమాను కూడా రమేష్ వర్మ తెరకెక్కిస్తారని.. ప్రస్తుతం ఆయన సీక్వెల్ స్క్రిప్ట్ పనులలో ఉన్నట్లు సమాచారం. రమేష్ వర్మ కెరీర్లో కూడా సాలిడ్ హిట్ అంటే రాక్షసుడు సినిమానే అని చెప్పాలి. మొన్నటి వరకు మాస్ రాజా రవితేజతో సినిమా ప్లాన్ చేస్తున్నట్లు తెలిపారు డైరెక్టర్ రమేష్ అలాగే నిర్మాత కోనేరు సత్యనారాయణ. మరి ఇప్పుడేమో రాక్షసుడు సీక్వెల్ కూడా వీరిద్దరే రూపొందిస్తారని టాక్. ఇక ప్రస్తుతం స్క్రిప్ట్ సిద్ధం అయితే వచ్చే ఏడాది సేమ్ టీంతో సినిమాను పట్టాలెక్కించాలని ప్రణాలిక రెడీ చేస్తున్నారట. చూడాలి మరి మరో రాక్షసుడు వస్తాడేమో..!