శ్రుతిహాసన్ కాదు `బిగ్ బాస్- 5` తమిళ్ హోస్ట్

కమల్ హాసన్ కు కోవిడ్ 19 పాజిటివ్ అని తేలిన విషయం తెలిసిందే. ఆయ‌న ఆరోగ్యంపై ర‌జ‌నీకాంత్ - చిరంజీవి వంటి ప్ర‌ముఖులు ఆరాలు తీసారు.

క‌మ‌ల్ ఆరోగ్యంగానే ఉన్నారు. చికిత్స పొందుతున్నారు. అయితే క‌మ‌ల్ హాస‌న్ ప్రాజెక్టుల‌పై ఈ ప్ర‌భావం ప‌డుతోంది. ఇప్పుడు తమిళంలో కూడా బిగ్ బాస్ 5ని హోస్ట్ చేస్తున్నారు క‌మ‌ల్. లైవ్ లో కార్య‌క్ర‌మం ఉంది కాబట్టి హోస్టింగ్ మార్పు గురించి ర‌క‌ర‌కాల గుస‌గుస‌లు వినిపిస్తున్నాయి.

కమల్ హాస‌న్ స్థానంలో ఆయ‌న కుమార్తె శృతిహాసన్ రెండు వారాల పాటు ఈ షోని హోస్ట్ చేయడానికి ఎంపికైంద‌ని క‌థ‌నాలొచ్చాయి. అయితే ఇప్పుడు చివరి నిమిషంలో పరిస్థితులు మారిపోయాయి.

కమల్ హాసన్ కు బదులుగా శ్రుతి కాదు.. శివ‌గామిగా పాపుల‌రైన‌ రమ్యకృష్ణ ఈ షో హోస్ట్ గా ఎంపికైనట్లు వార్తలు వస్తున్నాయి. రమ్య ఇప్పటికే తెలుగు వెర్షన్ కు హోస్ట్ గా వ్యవహరించి అంద‌రి దృష్టిని ఆక‌ర్షించిన సంగ‌తి తెలిసిందే.

స్టార్ హీరోల‌కు ధీటైన ఛ‌రిష్మా ర‌మ్య మ్యాడ‌మ్ కి ఉంది. అందుకే త‌న ఎంపిక ఫైన‌ల్ అని గుస‌గుస వినిపిస్తోంది. అయితే దానిపై అధికారికంగా క‌న్ఫ‌ర్మేష‌న్ రావాల్సి ఉంది. ర‌మ్య‌కృష్ణ చెన్నై ప‌రిశ్ర‌మ‌కు బాగా సుప‌రిచితం. అక్క‌డ రియ‌ల్ ఎస్టేట్ కూడా చేశారు. ఇటీవ‌ల వ‌రుస చిత్రాల్లో న‌టిస్తూ బిజీగా ఉన్నారు. ఇటు తెలుగులోనూ ప‌లు చిత్రాల్లో న‌టిస్తున్నారు.

అలాగే క‌మ‌ల్ వార‌సురాలు శ్రుతిహాస‌న్ ఇటీవ‌ల వరుస చిత్రాల‌తో బిజీగా ఉన్న సంగ‌తి తెలిసిందే. ప్రభాస్ - ప్రశాంత్ నీల్ కాంబినేష‌న్ మూవీ స‌లార్ లో కథానాయిక‌గా న‌టిస్తోంది. శ్రుతి న‌టించిన ప‌లు చిత్రాలు విడుద‌ల‌కు రావాల్సి ఉంది.