ఎట్టకేలకు రిలీజ్ కు రెడీ అయిన రానా ‘1945’

దగ్గుబాటి రానా ప్రధాన పాత్రలో నటించిన పీరియాడికల్ డ్రామా ''1945'' ఎట్టకేలకు విడుదలకు సిద్ధమైంది. నిజానికి ఐదేళ్ల క్రితమే ఈ సినిమా పూర్తయింది. అనివార్య కారణాల వల్ల విడుదలలో జాప్యం జరుగుతూ వచ్చింది. అయితే డిసెంబర్ 31వ తేదీన ఈ చిత్రాన్ని ప్రేక్షకుల ముందుకు తీసుకురానున్నట్లు నిర్మాత సి.కళ్యాణ్ తాజాగా వెల్లడించారు.

ఈ సందర్భంగా '1945' చిత్రం నుంచి విడుదల కాబడిన పోస్టర్ ఆసక్తికరంగా ఉంది. ఇందులో తగలబడుతున్న బ్రిటీష్ జాతీయ జెండాను ఆయుధంగా మార్చుకొని రానా జంపు చేస్తూ కనిపిస్తున్నారు. దేశభక్తిని చాటిచెప్పే ఈ పేట్రియాటిక్ మూవీలో ఇండియన్ నేషనల్ ఆర్మీ సైనికుడిగా, స్వాతంత్ర్య సమరయోధుడు సుభాష్‌ చంద్రబోస్ అనుయాయిగా రానా కనిపించనున్నారు.

''1945'' చిత్రానికి సత్యశివ దర్శకత్వం వహించారు. సీకే ఎంటర్టైన్మెంట్స్ బ్యానర్ పై సి. కళ్యాణ్ భారీ బడ్జెట్ తో నిర్మించారు. ఇందులో రానా సరసన రెజీనా కసాండ్రా హీరోయిన్ గా నటించింది. సత్యరాజ్ - నాజర్ - ఆర్జే బాలాజీ ముఖ్యమైన పాత్రలు పోషించారు. యువన్ శంకర్ రాజా ఈ చిత్రానికి సంగీతం సమకూర్చగా.. అనంత శ్రీరామ్ పాటలు రాశారు. ఆకుల శివ సంభాషణలు అందించారు. సత్య సినిమాటోగ్రాఫర్ గా వ్యవహరించారు.

ఇప్పటికే '1945' సినిమాకి సంబంధించిన సెన్సార్ కార్యక్రమాలు పూర్తయ్యాయని.. క్లీన్ 'U' సర్టిఫికెట్ వచ్చిందని నిర్మాత తెలియజేశారు. ఫస్ట్ లుక్ రెండు మూడు రోజుల్లో వస్తుందని.. వారంలో టీజర్ రిలీజ్ చేస్తామని తెలిపారు. ఇకపోతే రానా నటించిన 'విరాట పర్వం' సినిమా కూడా కంప్లీట్ అయింది. వేణు ఉదుగుల దర్శకత్వంలో రూపొందిన ఈ సినిమా కూడా విడుదలకు సిద్ధంగా ఉంది.