రానా స్పీచ్.. స్పీచ్‌లెసేనట..

‘ఘాజీ’ సినిమా గురించి ఏమో అనుకున్నారు కానీ.. ఈ సినిమాకు సంబంధించిన విశేషాలు ఒక్కొక్కటిగా బయటికి వస్తుంటే మాత్రం ఇది మామూలు సినిమా కాదని అర్థమవుతోంది. ‘ఘాజీ’ థియేట్రికల్ ట్రైలర్ చూడగానే ఓ హాలీవుడ్ సినిమాను తలపించింది. ఆ తర్వాత బయటికి వచ్చిన మేకింగ్ వీడియోలు.. ఈ చిత్ర టెక్నీషియన్స్ పంచుకున్న విశేషాలు చూస్తే ఒక గొప్ప ప్రయత్నమే చేశారని అర్థమవుతోంది. ఇంకో ఐదు రోజుల్లో ప్రేక్షకుల ముందుకు రాబోతున్న ‘ఘాజీ’ గురించి బాలీవుడ్లో సైతం గొప్పగా చెప్పుకుంటున్నారు. ఆల్రెడీ బాలీవుడ్ సెలబ్రెటీలకు ‘ఘాజీ’ ప్రివ్యూ కూడా వేశారు. చూసిన వాళ్లు సినిమా అద్భుతం అంటున్నారు. రవీనా టాండన్ ఈ సినిమా గురించి చిన్న రివ్యూ కూడా ఇచ్చేసింది. ఇలాంటి సినిమా చూసినందుకు గర్విస్తున్నానని తెలిపింది.

ఈ సినిమా ప్రివ్యూ చూసిన వాళ్లు చెబుతున్నదేంటంటే.. సినిమా ప్రి క్లైమాక్స్‌లో రానా తన సహచరుల్ని ఉద్దేశించి ఇచ్చే స్పీచ్ మైండ్ బ్లోయింగ్‌గా ఉంటుందట. రోమాలు నిక్కబొడుచుకునేలా ఉంటుందట ఆ స్పీచ్. దేశభక్తి ఉన్న వాళ్లందరికీ హృదయాలు ఉప్పొంగిపోయేలా ఈ స్పీచ్ అద్భుతంగా సాగుతుందట. దీని గురించి రానా చెబుతూ.. ‘‘ఈ స్పీచ్ చాలా ఇన్‌స్పైరింగ్‌గా.. ఎమోషనల్‌గా ఉండాలి. సినిమాకు ఆ స్పీచే చాలా కీలకం. సంకల్ప్ అద్భుతమైన డైలాగులు రాశాడు. అవి చాలా పొదుపుగానే ఉంటూ బలంగా హృదయాన్ని తాకేలా ఉంటాయి. ఆ స్పీచ్ ఇస్తుంటే నాలోనే దేశభక్తి భావాలు పొంగిపొర్లాయి. థియేటర్లో ఈ సీన్ చూసిన వాళ్లకు కూడా ఇదే ఫీలింగ్ కలుగుతుంది’’ అని చెప్పాడు. మరి అంతగా ఆ స్పీచ్‌లో ఏముందో వచ్చే శుక్రవారం తేలిపోతుంది.