'అచ్చ తెలుగందమే'.. మహేష్ మేనల్లుడి కోసం సిద్ శ్రీరామ్ పాడిన మెలోడీ..!

సూపర్ స్టార్ కృష్ణ మనవడు.. మహేష్ బాబు మేనల్లుడు.. ఏంపీ గల్లా జయదేవ్‌ తనయుడు అశోక్ గల్లా హీరోగా పరిచయమవుతున్న చిత్రం ''హీరో''. యంగ్ డైరెక్టర్ శ్రీరామ్ ఆదిత్య ఈ చిత్రానికి దర్శకత్వం వహిస్తున్నారు. ఇందులో అశోక్ సరసన ఇస్మార్ట్ బ్యూటీ నిధి అగర్వాల్ హీరోయిన్ గా నటిస్తోంది. ఇప్పటికే మహేష్ చేతుల మీదుగా విడుదలైన ఫస్ట్ లుక్ - టైటిల్ టీజర్ మంచి స్పందన తెచ్చుకున్నాయి. కౌబాయ్ - లవర్ బాయ్ - యాక్టన్ హీరో - జోకర్.. ఇలా అన్ని వెరీయేషన్స్ చూపించి ఆకట్టుకున్నాడు.

''హీరో'' చిత్రాన్ని నవంబర్ నెలలోనే థియేట్రికల్ రిలీజ్ చేయబోతున్నట్లు మేకర్స్ ఇటీవలే అధికారికంగా ప్రకటించారు. ఈ నేపథ్యంలో రాబోయే రోజుల్లో అగ్రెసివ్ గా ప్రమోషనల్ ఈవెంట్స్ ప్లాన్ చేస్తున్నారు. ఇందులో భాగంగా ఈరోజు సోమవారం సినిమాలోని ''అచ్చ తెలుగందమే'' అనే మెలోడీ గీతాన్ని హ్యాండ్సమ్ హంక్ రానా దగ్గుబాటి రిలీజ్ చేసి చిత్ర బృందానికి విషెస్ అందజేశారు.

'నింగిలో తారక నేలపై వాలెనే.. కన్నుల పండగై కాలమే ఆగనే.. ప్రేమనే బాణమే నన్నిలా తాకేనే..' అంటూ సాగిన ఈ పాట శ్రోతలను అలరిస్తోంది. యువ గాయకుడు సిద్ శ్రీరామ్ మరోసారి తన గాత్రంతో మాయ చేశారు. మ్యూజిక్ డైరెక్టర్ జిబ్రాన్ ఈ గీతానికి స్వరాలు సమకూర్చగా.. గేయ రచయిత రామజోగయ్య శాస్త్రి సాహిత్యం అందించారు. ఈ సాంగ్ లో అశోక్ - నిధి అగర్వాల్ లుక్స్.. ఇద్దరి మధ్య కెమిస్ట్రీ బాగా కుదిరాయి. నిధి వెటర్నరీ డాక్టర్ గా కనిపిస్తుండగా.. హీరో ఆమె ప్రేమ కోసం ప్రయత్నాలు చేస్తున్నారు. విజువల్ పరంగా కూడా 'అచ్చ తెలుగందమే' పాట ఆకట్టుకుంటోంది.

సూపర్ స్టార్ కృష్ణ మరియు గల్లా అరుణకుమారి సమర్పణలో ''హీరో'' సినిమా రూపొందుతోంది. అమ‌ర్‌ రాజా మీడియా అండ్ ఎంట‌ర్‌టైన్‌మెంట్ బ్యాన‌ర్‌ పై ప‌ద్మావ‌తి గ‌ల్లా ఈ చిత్రాన్ని నిర్మిస్తున్నారు. సమీర్ రెడ్డి - రిచర్డ్‌ ప్రసాద్‌ సినిమాటోగ్రఫీ అందించగా.. ప్రవీణ్‌ పూడి ఎడిటింగ్ వర్క్ చేశారు. డిఫరెంట్‌ ఎంటర్‌టైనర్‌ గా రూపుదిద్దుకుంటున్న ఈ చిత్రంలో జగపతిబాబు - నరేష్ - కౌశల్యా - వెన్నెల కిశోర్ - బ్రహ్మాజీ - సత్య - అర్చన సౌందర్య - మైమ్‌ గోపి - అజయ్‌ ప్రభాకర్‌ తదితరులు ఇతర పాత్రలు పోషిస్తున్నారు. మహేష్ బాబు ఫ్యామిలీ నుంచి వస్తున్న మూడోతరం హీరో కావడంతో 'హీరో' సినిమా కోసం అభిమానులు ఆసక్తిగా ఎదురుచూస్తున్నారు. త్వరలోనే ఈ మూవీ రిలీజ్ డేట్ ని అనౌన్స్ చేయనున్నారు.