రానా దగ్గుబాటి.. మరో స్టన్నింగ్ అవతార్

దగ్గుబాటి రానా తన తొలి సినిమాలో ‘లీడర్’లో ఎంత సన్నగా.. సాఫ్ట్‌ గా కనిపించాడో తెలిసిందే. ఆ లుక్ తో పోల్చుకుని.. ‘బాహుబలి’లో భల్లాలదేవుడి అవతారాన్ని చూస్తే షాకవడం ఖాయం. రానా గురించి తెలియని వాళ్లకు రెండు సినిమాల్లో ఉన్నది ఒకడే అని చెబితే నమ్మరేమో. పాత్రలు.. లుక్స్ విషయం లో ఈ వైవిధ్యం చూపించడం ద్వారానే రానా తన ప్రత్యేకతను చాటుకుంటూ సాగుతున్నాడు.

‘బాహుబలి’లో అంత భారీ అవతారంలో కనిపించిన అతను.. ‘యన్.టి.ఆర్’లో చంద్రబాబు నాయుడి పాత్ర కోసం పూర్తిగా లుక్ మార్చుకున్నాడు. బాగా బరువు తగ్గి ఒకప్పటిలా సన్నగా తయారయ్యాడు. కానీ ఈ అవతారంలో ఎన్నో రోజులు కొనసాగట్లేదు. మళ్లీ తన కొత్త సినిమా కోసం లుక్ మార్చేస్తున్నాడు. రానా హీరోగా ‘హాథీ మేరీ సాథీ’ పేరుతో బహుభాషా చిత్రం తెరకెక్కుతున్న సంగతి తెలిసిందే. ఇంతకుముందే కొన్ని రోజుల పాటు ఈ చిత్ర షూటింగ్ లో పాల్గొన్నాడు రానా. కొంచెం గ్యాప్ తర్వాత చిత్రీకరణ పున:ప్రారంభం కాబోతోంది.

కొత్త షెడ్యూల్ కోసం రానా పూర్తిగా అవతారం మార్చేస్తున్నాడట. మళ్లీ బరువు పెరిగి.. జుట్టు.. గడ్డం పెంచి రఫ్ లుక్ లోకి మారబోతున్నాడట. ఇందులో రానా మావటి వాడిగా కనిపించబోతున్నాడు. ఇందులో అతను వివిధ వయసుల్లో కనిపిస్తాడట. 50 ఏళ్ల వాడిగా కూడా కనిపించాల్సి ఉందట. కొత్త షెడ్యూల్ లో ఆ అవతారంలోనే కనిపించాల్సి ఉంటుందట. అందుకోసమే మేకోవర్ ట్రై చేస్తున్నాడట. జనాలు స్టన్ అయిపోయేలా ఆ లుక్ ఉంటుందని అంటున్నారు. తమిళ దర్శకుడు ప్రభు సాల్మన్ ఈ చిత్రాన్ని రూపొందిస్తున్నాడు. హిందీతో పాటు తెలుగు.. తమిళ భాషల్లో ఈ చిత్రం తెరకెక్కుతోంది. ఈ చిత్రం వచ్చే ఏడాది ద్వితీయార్ధంలో ప్రేక్షకుల ముందుకొస్తుంది.