రానా ద‌గ్గుబాటి ప్రొడ‌క్ష‌న్‌.. మోహ‌న్ బాబు మంచు యాక్ష‌న్‌!

ఇన్నాళ్లూ సైలెంట్ గా ఉన్న మోహ‌న్ బాబు.. ఇప్పుడు సినిమాల్లో దూకుడు పెంచారు. త‌న చిర‌కాల మిత్రుడు చిరంజీవితో స్ఫూర్తిపొందారో ఏమో తెలియ‌దుగానీ.. దాదాపు ద‌శాబ్ద కాలంపాటు చిత్రాల‌కు దూరంగా ఉన్న క‌లెక్ష‌న్ కింగ్‌.. మ‌ళ్లీ గేరు మార్చిన‌ట్టు క‌నిపిస్తోంది.

ప్ర‌స్తుతం ఆయ‌న బ్యాన‌ర్ లో 'స‌న్ ఆఫ్ ఇండియా' అనే చిత్రం తెరకెక్కుతున్న విషయం తెలిసిందే. రత్నబాబు డైరెక్షన్లో రూపొందుతున్న ఈ మూవీ.. ప్రస్తుతం సెట్స్ పై ఉంది. ఈ మ‌ధ్య‌నే వ‌చ్చిన సూర్య 'ఆకాశం నీహద్దురా' సినిమాలో కీ రోల్ పోషించి అలరించారు మోహన్ బాబు. అటు కోలీవుడ్ లోనూ సినిమా చేస్తున్నారు. 'పొన్నియన్ సెల్వన్' చిత్రంలో నటిస్తున్నారు నట ప్రపూర్ణ.

త్వ‌ర‌లో తెలుగులో మ‌రో చిత్రంలో న‌టించ‌బోతున్న‌ట్టు ప్ర‌క‌టించారు మోహ‌న్ బాబు. అది కూడా యంగ్ డైన‌మైట్ రానా ద‌గ్గుబాటి ప్రొడ‌క్ష‌న్లో అని, స్వ‌యంగా మోహ‌న్ బాబు ప్ర‌క‌టించ‌డం విశేషం. మంచు విష్ణు హీరోగా న‌టించిన 'మోస‌గాళ్లు' ప్రీ రిలీజ్ ఈ వెంట్లో ఈ విషయం వెల్లడించారు మోహన్ బాబు.

ఈ కార్య‌క్ర‌మానికి వ‌చ్చేసిన రానాతో కాసేపు స‌ర‌దా సంభాష‌ణ చేసిన ఆయ‌న‌.. ఆ త‌ర్వాత రానా ప్రొడ‌క్ష‌న్లో తాను సినిమా చేయ‌బోతున్న‌ట్టు తెలిపారు. మ‌రి, ఇందులో వాస్త‌వం ఎంత‌? అనేది తెలియాలంటే.. అధికారిక ప్ర‌క‌ట‌న వ‌చ్చే వ‌ర‌కూ వెయిట్ చేయాల్సిందే.