బంగ్లా ఫ్యాన్‌ మృతికి రానా సంతాపం

బాలీవుడ్‌ స్టార్స్‌ కూడా కొందరు విదేశాల్లో అభిమానులను పొందలేరు. కాని బాహుబలి చిత్రం వల్ల ప్రభాస్‌, రానా, సుబ్బరాజు ఇంకా పలువురు దేశ విదేశాల్లో మంచి గుర్తింపును దక్కించుకున్నారు. పలు దేశాల్లో బాహుబలి స్టార్స్‌ కు ఫ్యాన్‌ ఫాలోయింగ్‌ కూడా బాగా ఉంది. తాజాగా రానా కోసం జపాన్‌ నుండి కొందరు అభిమానులు బహుమానాలు కూడా పంపిన విషయం తెల్సిందే. ఇంకా పలు దేశాల్లో ఉన్న రానా అభిమానులు ఆయనపై తమకు ఉన్న అభిమానంను చాటుకుంటూనే ఉంటారు. రానాకు బంగ్లాదేశ్‌ కు చెందిన అనామిక అనే యువతి వీరాభిమాని. రానా అంటే పడి చచ్చే ఆ అమ్మాయి ఇటీవల మృతి చెందింది.

అనామిక మృతి విషయంను రానా ఫ్యాన్స్‌ పేజ్‌ లో ట్వీట్‌ చేయడం జరిగింది. బంగ్లాదేశ్‌ కు చెందిన అనామిక రానాకు వీరాభిమాని, కాని ఇప్పుడు ఆమె లేదు, ఆమె మృతికి తమ ప్రగాఢ సానుభూతిని వ్యక్తం చేస్తున్నట్లుగా రానా ఫ్యాన్‌ పేజీలో పోస్ట్‌ చేయడం జరిగింది. ఆ పోస్ట్‌ కు రానా స్పందిస్తూ తన ప్రగాడ సంతాపంను తెలియజేస్తున్నట్లుగా చెబుతూ, ఆమె కుటుంబ సభ్యులకు తన సానుభూతి వ్యక్తం చేశాడు. విదేశీ ఫ్యాన్‌ మృతి చెందడంతో రానా సోషల్‌ మీడియా ద్వారా స్పందించడం అందరి దృష్టిని ఆకర్షిస్తోంది. ఒక అభిమాని మృతి గురించి రానా స్పందించి తన మంచి మనసును చాటుకున్నాడు.

ప్రస్తుతం రానా నక్సలైట్‌ పాత్రలో వేణు ఉడుగుల దర్శకత్వంలో ఒక చిత్రాన్ని చేస్తున్నాడు. సురేష్‌ బాబు ఈ చిత్రాన్ని నిర్మిస్తున్నాడు. ప్రస్తుతం సినిమాకు సంబంధించిన ప్రీ ప్రొడక్షన్‌ వర్క్‌ జరుగుతోంది. త్వరలోనే సినిమాను పట్టాలెక్కించబోతున్నారు. ఈ చిత్రం మాత్రమే కాకుండా ఇంకా పలు సినిమాలకు రానా కమిట్‌ అయ్యాడు. అవి కూడా త్వరలోనే పట్టాలెక్కనున్నాయి.