భ‌ల్లాల‌దేవుడు సై.. బ‌ట్ శేఖ‌ర్ క‌మ్ముల నైనై..

భ‌ల్లాలదేవ రానా మ‌ళ్లీ జోరు పెంచేశారు. ప‌వ‌న్ స్టార్ ప‌వ‌న్ క‌ల్యాణ్ తో క‌లిసి `భీమ్లానాయ‌క్‌`లో డానియ‌ల్ శేఖ‌ర్ గా అద‌ర‌గొట్టిన విష‌యం తెలిసిందే. సాగ‌ర్ కె. చంద్ర డైరెక్ష‌న్ లో సూర్య దేవ‌ర నాగ‌వంశీ నిర్మించిన ఈ చిత్రానికి మాట‌ల మాంత్రికుడు త్రివిక్ర‌మ్ మాట‌లు, స్క్రీన్ ప్లే అందించిన ప్ర‌ధాన బ‌లంగా నిలిచారు.

మ‌ల‌యాళ సూప‌ర్ హిట్ ఫిల్మ్ `అయ్య‌ప్ప‌నుమ్ కోషియుమ్‌` ఆధారంగా రూపొందిన ఈ చిత్రం ఫ్యాన్స్తో పాటు థియేట‌ర్ల‌కు పండ‌గ వాతావ‌రణాన్ని తీసుకొచ్చింది. గ‌త నెల 25న విడుద‌లైన ఈ చిత్రం బాక్సాఫీస్ వ‌ద్ద భారీ వ‌సూళ్ల‌ని సాధిస్తూ సంచ‌ల‌నాలు సృష్టిస్తోంది.

ఈ స‌క్సెస్ ని ఎంజాయ్ చేస్తున్న రానా ద‌గ్గుబాటి ఈ మూవీ ప్ర‌మోష‌న్స్ లో పాల్గొంటున్నారు. రిలీజ్ కు ముందు చాలా వ‌ర‌కు అందుబాటులో లేని రానా `భీమ్లానాయ‌క్‌` రిలీజ్ త‌రువాత ఈ మూవీ ప్ర‌మోష‌న్స్ లో చురుగ్గా పాల్గొంటున్నారు.

సినిమాలో ప‌వ‌న్ తో పోటాపోటీగా త‌న పాత్ర‌ని మ‌లిచిన తీరు త‌న అభిమానుల‌కు న‌చ్చ‌య‌డంతో చాలా హ్యాపీగా ఫీల‌వుతున్న రానా ఈ సందర్భంగా ప‌లు మీడియా సంస్థ‌ల‌తో మాట్లాడుతూ త‌న నెక్స్ట్ ప్రాజెక్ట్ లకు సంబంధించిన ఆస‌క్తిక‌ర విష‌యాల్ని వెల్ల‌డించారు.

ఈ సంద‌ర్భంగా రానా `లీడ‌ర్` సీక్వెల్ పై .. ద‌ర్శ‌కుడు శేఖ‌ర్ క‌మ్ముల‌పై ప‌లు ఆస‌క్తిక‌ర వ్యాఖ్య‌లు చేయ‌డం ప్రాధాన్య‌త‌ను సంత‌రించుకుంది. ప‌న్నెండేళ్ల క్రితం రానా హీరోగా `లీడ‌ర్‌` మూవీతో ప‌రిచ‌య‌మ‌య్యారు. సెన్సిబుల్ డైరెక్ట‌ర్ శేఖ‌ర్ క‌మ్ముల డైరెక్ట్ చేసిన పొలిటిక‌ల్ థ్రిల్ల‌ర్ హీరోగా రానాకు మంచి పేరు తెచ్చిపెట్టింది.

అర్జున్ ప్ర‌సాద్ పాత్ర‌లో రానా క‌నిపించిన తీరు, ఆ పాత్ర‌లో ఒదిగిపోయిన విధానం ప్ర‌తీ ఒక్క‌రినీ ఆక‌ట్టుకుంది. పొలిటిక‌ల్ నేప‌థ్యంలో రూపొందిన చిత్రాల్లోనే ఇదొక క్లాసిక్ అని అంతా అన్నారు.

ఇప్ప‌టికీ దీనికి సీక్వెల్ చేస్తే చూడాల‌ని చాలా మంది ఆస‌క్తిగా ఎదురుచూస్తున్నారు. ముందు ఈ క‌థ‌ని శేఖ‌ర్ క‌మ్ముల వేరే వాళ్ల‌తో చేయాల‌నుకున్నార‌ట‌. కానీ క‌మ‌ర్షియ‌ల్ ఎలిమెంట్స్ ని మ‌రింత‌గా జోడించాల‌ని భారీ మార్పులు చెప్ప‌డంతో ఆ మార్పులు చేయ‌డం ఇష్టం లేక శేఖ‌ర్ క‌మ్ముల చివ‌రికి రానాతో చేశాడ‌ట‌.

ఇదిలా వుంటే ఈ చిత్రానికి సీక్వెల్ గా `లీడ‌ర్ -2` ని త్వ‌ర‌లోనే చేస్తామంటూ అర‌ణ్య‌, ల‌వ్ స్టోరీ చిత్రాల స‌మ‌యంలో శేఖ‌ర్ క‌మ్ముల చెప్పుకొచ్చారు. దీంతో మ‌ళ్లీ ఇన్నాళ్ల‌కు `లీడ‌ర్‌` సీక్వెల్ పై చ‌ర్చ మొద‌లైంది.

తాజాగా ఈ ప్రాజెక్ట్ పై రానా స్పందించారు. `భీమ్లానాయ‌క్‌` ప్ర‌మోష‌న్ లో బిజీగా వున్న రానా `లీడ‌ర్‌` సీక్వెల్ పై ఆస‌క్తిక‌ర వ్యాఖ్య‌లు చేశారు. శేఖ‌ర్ క‌మ్ముల `లీడ‌ర్` సీక్వెల్ గురించి చెప్పారు. రెండు మూడు సీన్ లు చెప్పేసి మ‌ళ్లీ సైలెంట్ అయిపోతున్నారు. దీన్ని ఎప్పుడు పూర్తి చేస్తారో ఆయ‌న చేతుల్లోనే వుంది` అని క్లారిటీ ఇచ్చారు.

అంటే సీక్వెల్ చేయ‌డానికి తాను రెడీగా వున్నాన‌ని కానీ శేఖ‌ర్ కమ్ముల మాత్రం ఇంకా ఏమీ తేల్చ‌డం లేద‌ని రానా ఇండైరెక్ట్ గా చెప్ప‌డం ఇప్పుడు హాట్ టాపిక్ గా మారింది. మ‌రి రానా వ్యాఖ్య‌ల‌పై శేఖ‌ర్ క‌మ్ముల ఏమంటారో చూడాలి అంటున్నాయి టాలీవుడ్ వ‌ర్గాలు.