హాలీవుడ్ వెళ్తున్న భల్లాలదేవా

రాజమౌళి ఏ ముహర్తంలో బాహుబలి తీయాలన్న ఆలోచన పుట్టిందో కానీ అది ఆర్టిస్టుల కెరీర్లనే కాదు తెలుగు సినిమా గమనాన్నే పెంచింది. అంతర్జాతీయ స్థాయిలో టాలీవుడ్ గర్వంగా నిలిచేలా ఎందరికో స్పూర్తినిచ్చింది. దీని వల్లే ప్రభాస్ రేంజ్ అమాంతం ఎగబాకిపోయి కనీసం వంద కోట్లు పెట్టనిదే ప్రేక్షకులు ఒప్పుకోరు అనే స్థాయిలో బడ్జెట్ అంచనాలు పెరుగుతున్నాయి. విలన్ గా నటించిన రానా పరిస్థితి కూడా దీనికి భిన్నంగా ఏమి లేదు. హీరో అవుదామని ఇండస్ట్రీకి వచ్చి ఆ పాత్రల్లో సెట్ కాలేక విలన్ గా తన జీవితాన్ని కొత్త మలుపు తిప్పుకుంది బాహుబలితోనే.

ఆ విజయమే తమిళ్ లో ఆఫర్లు వచ్చేలా చేసింది. హింది నుంచి హాతీ మేరె సాతిలో అవకాశాన్ని ఇచ్చింది. కాస్త ఆరోగ్య సమస్యల వల్ల మధ్యలో గ్యాప్ తీసుకున్నాడు కాని లేదంటే సైరాలో సైతం ఉండేవాడని కొంత కాలం టాక్ బలంగానే నడిచింది. ఇదిలా రానా గ్రాఫ్ బుక్ లో మరో మైలు రాయి జత కాబోతోంది. అదే హాలీవుడ్ ఎంట్రీ. ఇప్పటికే ఒక టీం రానాతో ప్రాజెక్ట్ గురించి చర్చించినట్టు సమాచారం. అందులో హీరోనా లేక విలనా అనే వివరాలు తెలియాల్సి ఉంది.

గతంలో అనిల్ కపూర్-ఇమ్రాన్ ఖాన్ లాంటి నటులు ఇంగ్లీష్ సినిమాలు చేసారు. కాని స్ట్రెయిట్ మూవీలో తెలుగు వాళ్ళు నటించడం బహుశా ఇదే మొదటిసారి కావొచ్చు. అప్పుడెప్పుడో పాతికేళ్ళ క్రితం చిరంజీవి హీరోగా అబు ది బాగ్దాద్ తీఫ్ అనే సినిమా షూటింగ్ ప్రారంభించుకుని ఆగిపోయింది. దాని తర్వాత మళ్లి ఎవరూ ఆ ప్రయత్నాలు చేయలేదు. ఇన్నాళ్ళకు రానా రూపంలో తెలుగు తేజం హాలీవుడ్ తెరపై మెరవబోతోంది. అయితే దీనికి సంబంధించిన వివరాలు తెలియడానికి ఇంకా టైం పడుతుంది కాబట్టి ఇంకొద్ది రోజులు ఎదురుచూపులు తప్పవు