హింసించే రాక్షసుడి పాత్రలో రానా?

రుద్రమదేవి మూవీతో పెద్ద రిస్క్ నే చేసిన దర్శక నిర్మాత గుణశేఖర్.. ఆ ప్రాజెక్ట్ ద్వారా తన స్థాయి ఎలాంటిదో చాటిచెప్పాడు. ఆ తర్వాతి ప్రాజెక్టుపై సుదీర్ఘ కాలంగా వర్క్ చేస్తున్న గుణశేఖర్.. హిరణ్యకశిప అంటూ ఓ చిత్రాన్ని తెరకెక్కించేందుకు సిద్ధమయ్యాడు. చారిత్రక చిత్రమైన రుద్రమదేవిని జనాలు మెచ్చేలా రూపొందించడంలో విజయం సాధించిన ఈ దర్శకుడు.. ఇప్పుడు పౌరాణిక చిత్రం కోసం ప్రిపేర్ అయిపోతున్నాడు.

ఈ మూవీలో వెంకటేష్ హీరోగా నటిస్తున్నాడనే న్యూస్ కొన్ని రోజుల నుంచి హల్ చల్ చేస్తోంది. హరిభక్తుడైన ప్రహ్లాదుడి తండ్రి హిరణ్యకశిపుడు.. ఇంటాబయటా కానీ.. పగలూ రాత్రి కానీ.. మనిషి-మృగం-దేవుడు.. ద్వారా చావు లేకుండా వరం పొందిన ఓ రాక్షసుడు. ఆ భక్తి నుంచి కొడుకును బయటకు తీసుకువచ్చేందుకు తెగ హింసలు పెడతాడు కూడా. చివరకు నరసింహుని రూపంలో వచ్చి హిరణ్యకశిపుడిని అంతమొందిస్తాడు నారాయణుడు. ఈ కథనే లేటెస్ట్ టెక్నాలజీతో రూపొందించేందుకు సిద్ధమవుతున్నాడు గుణశేఖర్. అయితే.. ఈ రాక్షసుని పాత్రకు గుణశేఖర్ ఆప్షన్ వెంకటేష్ కాదని.. దగ్గుబాటి రానా అని తెలుస్తోంది.

విభిన్న చిత్రాలు.. ముఖ్యంగా చారిత్రక.. జానపద చిత్రాలతో తన సత్తా చాటుతున్న రానా... ఈ పౌరాణిక చిత్రంలోని హిరణ్యకశిపుడి పాత్రపై కూడా ఎంతో మక్కువ చూపుతున్నాడట. రీసెంట్ ‌గా నేనే రాజు నేనే మంత్రితో మంచి సక్సెస్ ను అందుకున్న రానా.. మరోసారి కొత్త జోనర్ లో సినిమాకు రెడీ అవుతున్నాడని.. త్వరలో ఈ చిత్రం షూటింగ్ ప్రారంభం కానుందని తెలుస్తోంది