రానా డిమాండ్ మామూలుగా లేదుగా

బాబాయ్ వెంకటేష్ లాగా కమర్షియల్ హీరోగా సెటిలవుదామని ఇండస్ట్రీకి వచ్చిన రానాకు బాహుబలి కొత్త దిశా నిర్దేశనం చేసింది. లీడర్ మినహాయించి రెగ్యులర్ ఫార్మాట్ లో చేసిన నా ఇష్టం, నేను నా రాక్షసి, కృష్ణం వందే జగద్గురుం అన్ని మిశ్రమ ఫలితాలు ఇవ్వడంతో రూట్ మార్చిన రానాకు ఇప్పుడు బాగానే వర్క్ అవుట్ అవుతోంది. పాత్రల ఎంపికలో నిబంధనలు పెట్టుకోకుండా దూసుకుపోతున్న రానా యాంకర్ గా కూడా తన మొదటి షో 'నెంబర్ వన్ యారి' సక్సెస్ చేసి చూపించి బుల్లితెరపై కూడా తన స్టామినా ప్రూవ్ చేసుకున్నాడు. తాజాగా బిగ్ బాస్ షో సీజన్ 2 కి స్టార్ మా ఛానల్ రానా వైపే చూస్తున్నట్టుగా తాజా సమాచారం. జూనియర్ ఎన్టీఆర్ సినిమాలకు ఇచ్చిన కమిట్మెంట్ వల్ల చేయలేను అని చెప్పేయడంతో ప్రత్యాన్మాయం కోసం వెతికిన స్టార్ ఛానల్ వేట రానా దగ్గర ఆగిందని టాక్.

తొలుత న్యాచురల్ స్టార్ నాని - స్టైలిష్ స్టార్ బన్నీ పేర్లు కూడా వినిపించాయి కాని వాళ్ళలో ఎవరో ఒకరు ఓకే చెప్పినా సెట్స్ పైకి వెళ్ళడానికి టైం పట్టేలా ఉండటంతో పాటు యాంకరింగ్ అలవాటు లేని ఆ ఇద్దరు ఎంతవరకు దీన్ని క్యారీ చేయగలరు అనే దాని గురించి కూడా చర్చలు జరిగాయట. రెమ్యునరేషన్ విషయంలో సైతం బడ్జెట్ ఎక్కువయ్యే అవకాశాలు ఉండటంతో ఇప్పటికే బుల్లితెర ప్రేక్షకులకు దగ్గరైనా రానాకే ఓటు వేయాలని నిర్ణయించి ఆ మేరకు ప్రతిపాదన కూడా పంపారట.

కాని రానా మాత్రం తనకు నెంబర్ వన్ యారి కంటే అధిక పారితోషికం కావాలని అడిగినట్టు టీవీ మీడియా సర్కిల్స్ లో జోరుగా వినిపిస్తోంది. ఎంత మొత్తం అనేది బయటికి రాలేదు కాని కాల్ షీట్స్ దీనికి ఎక్కువ అవసరం పడతాయి కాబట్టి ఆ మేరకు రానా ఒక ఫిగర్ కోట్ చేసినట్టు టాక్. ఒకవేళ స్టార్ మా ఇది భరించదగ్గ మొత్తమే అని ఫీల్ అయితే బిగ్ బాస్ 2 యాంకర్ గా రానాను చూడడానికి ఎక్కువ సమయం పట్టకపోవచ్చు.