శాతకర్ణి.. ఓ సెన్సేషనల్ న్యూస్

నిజంగా ఇది సెన్సేషనల్ న్యూసే మరి. ‘గౌతమీ పుత్ర శాతకర్ణి’లో ఓ సెన్సేషనల్ యాక్టర్ ఓ కీలక పాత్ర పోషిస్తున్నట్లు సమాచారం. ఆ నటుడు మరెవరో కాదు.. రానా దగ్గుబాటి. ‘బాహుబలి’లో భల్లాలదేవుడి పాత్రతో రానా ఇమేజ్ ఎక్కడికో వెళ్లిపోయింది. ‘రుద్రమదేవి’లో సైతం ఓ ముఖ్య పాత్రలో మెప్పించిన రానా.. చారిత్రక సినిమాల్లో పాత్రలకు తాను మంచి ఛాయిస్ అని రుజువు చేసుకున్నాడు.

బాలయ్య సినిమాలో రానా ఓ పాత్ర చేస్తే జనాల్లో మరింత ఆసక్తి కలగడం ఖాయమన్న ఉద్దేశంతో ఓ కీలక పాత్రకు అతణ్ని ఎంచుకున్నాడట క్రిష్. రానా ఇప్పటికే క్రిష్ తో ఓసారి పని చేశాడు. వీళ్లిద్దరి కాంబినేషన్లో ‘కృష్ణం వందే జగద్గురుం’ వచ్చింది. ఆ సినిమా కమర్షియల్ సక్సెస్ కాకపోయినా రానా కెరీర్లో ప్రత్యేకంగా నిలిచిపోయే చిత్రంగా చెప్పొచ్చు. ఇప్పుడిక ‘గౌతమీపుత్ర శాతకర్ణి’లో రానా కోసం క్రిష్ ఎలాంటి పాత్ర రెడీ చేశాడో.. దాన్ని రానా ఎలా చేస్తాడో.. బాలయ్య-రానా మధ్య సన్నివేశాలు ఎలా ఉంటాయో చూడాలి.

ప్రస్తుతం శాతకర్ణి షూటింగ్ మొరాకాలో జరుగుతున్న సంగతి తెలిసిందే. ఓ భారీ వార్ సీక్వెన్స్ చిత్రీకరిస్తున్నారక్కడ. దీని కోసం రోజుకు 12 గంటల దాకా కష్టపడుతున్నాడట బాలయ్య. క్రిష్ అయితే రేయింబవళ్లు శ్రమిస్తున్నాడట. రూ.8 కోట్ల ఖర్చుతో ఈ సన్నివేశాల్ని చిత్రీకరిస్తున్నారు. ఇది ముగించుకుని హైదరాబాద్ వచ్చాక ఈ సినిమాలో నటించే హీరోయిన్ ఎవరో ప్రకటిస్తారు. ఆ సందర్భంగానే రానా పాత్ర గురించి కూడా క్లారిటీ వస్తుంది. ఇప్పటికే ఈ సినిమాలో బాలీవుడ్ నటులు హేమమాలిని..కబీర్ బేడీ నటిస్తున్న సంగతి తెలిసిందే. రానా కూడా యాడ్ అయ్యాడంటే బాలీవుడ్లోనూ ఈ సినిమా మీద హైప్ రావడం ఖాయం.