హృతిక్-అక్షయ్ సినిమాకు రానా పచ్చజెండా

తెలుగులో హీరోగా నటిస్తూనే ఇతర భాషల చిత్రాల్లో నటిస్తూ తన కెరీర్ లో ముందుకు దూసుకుపోతున్నాడు రానా దగ్గుబాటి. 'బాహుబలి' లో భల్లాలదేవుడి పాత్రలో జనాలను బెదరగొట్టి మరీ దేశవ్యాప్తంగా గుర్తింపు సాధించాడు. తాజాగా రానా ఒక భారీ బాలీవుడ్ ప్రాజెక్టుకు సైన్ చేశాడని ముంబై మీడియా కొక్కొరోక్కో అని కోడై కూస్తోంది.

అక్షయ్ కుమార్.. హృతిక్ రోషన్ లు హీరోలుగా ఒక పౌరాణిక చిత్రం తెరకెక్కనుందట. ప్రముఖ బాలీవుడ్ నిర్మాణ సంస్థ ఈ సినిమాను భారీ బడ్జెట్ తో నిర్మించేందుకు సన్నాహాలు చేస్తోందట. ఈ సినిమాలో ఒక కీలక పాత్ర కోసం రానాను సంప్రదించారని.. రానా కూడా వారికి గ్రీన్ సిగ్నల్ ఇచ్చారని సమాచారం. అయితే ఈ సినిమాకు దర్శకుడు.. నిర్మాత లాంటి ఇతర వివరాలు ఇంకా వెల్లడి కాలేదు. అతి త్వరలో ఈ సినిమాకు సంబంధించిన అధికారిక ప్రకటన రానుందట.

ఈ బాలీవుడ్ ప్రాజెక్టు సంగతి ఇలా ఉంటే రానా ప్రస్తుతం రెండు సినిమాల్లో నటిస్తున్నాడు. అందులో ఒకటి 'హాథి మీరే సాథి' కాగా మరొకటి 'విరాట పర్వం'. ఈ రెండు సినిమాలు కాకుండా గుణశేఖర్ దర్శకత్వంలో తెరకెక్కబోయే భారీ బడ్జెట్ చిత్రం 'హిరణ్యకశ్యప' సినిమాకు ప్రీ ప్రొడక్షన్ జోరుగా సాగుతోంది.