అబ్బో.. రాజశేఖర్ కోసం ఎంతమందో?

సీనియర్ హీరో రాజశేఖర్ చాలా గ్యాప్ తర్వాత చేస్తున్న సినిమా ‘గరుడ వేగ’. ప్రవీణ్ సత్తారు దర్శకత్వంలో రూపొందుతున్న ఈ సినిమా సెట్స్ మీదికి వెళ్లి ఏడాది దాటుతోంది. ఈ ఏడాది ఆరంభంలో ఒక ఫస్ట్ లుక్ రిలీజ్ చేయడం తప్పితే ఈ సినిమాకు సంబంధించి మరే విశేషాన్నీ పంచుకోలేదు. మధ్యలో కొన్ని నెలలుగా ఈ సినిమా వార్తల్లోనే లేదు. ఎట్టకేలకు ‘గరుడ వేగ’ ఫస్ట్ టీజర్ లాంచ్ చేయబోతున్నారు. ఈ విషయంలో చిత్ర బృందం బాగానే హడావుడి చేస్తోంది. ఒకరు కాదు.. ఇద్దరు కాదు.. ఏకంగా నలుగురు సెలబ్రెటీలతో వేర్వేరుగా సోషల్ మీడియాలో ‘గరుడ వేగ’ టీజర్ లాంచ్ చేయించబోతుండటం విశేషం.

రానా దగ్గుబాటి.. కాజల్ అగర్వాల్.. తాప్సి పన్ను.. మంచు లక్ష్మి ఈ నలుగురి చేతుల మీదుగా ‘గరుడ వేగ’ టీజర్ లాంచ్ కాబోతోంది. శుక్రవారం సాయంత్రం 5 గంటలకు ఈ నలుగురు ఒకేసారి తమ ట్విట్టర్.. ఫేస్ బుక్ అకౌంట్ల ద్వారా టీజర్ లాంచ్ చేస్తారట. మరి ముగ్గురూ మూడు రకాల టీజర్లు రిలీజ్ చేస్తారా.. లేక ఒకే టీజర్ ను నలుగురు లాంచ్ చేస్తారా అన్నది చూడాలి. ఇలా నలుగురు పేరున్న సెలబ్రెటీల్ని టీజర్ లాంచ్ కోసం ఒప్పించడంలో రాజశేఖర్ బాగానే సక్సెస్ అయ్యాడు. నేషనల్ ఇన్వెస్టిగేటివ్ ఏజెన్సీ అధికారిగా రాజశేఖర్ ‘గరుడ వేగ’లో నటిస్తున్నాడు. ‘విశ్వరూపం’ భామ పూజా కుమార్ కథానాయిక. తమిళ నటుడు కిషోర్ విలన్ పాత్ర చేస్తున్నాడు. కోటేశ్వరరాజు నిర్మిస్తున్న ఈ చిత్ర బడ్జెట్ రూ.25 కోట్ల పైనే కావడం విశేషం.